Кечки овқат учун сўйилган ўрдак ичидан 1700 долларлик олтин чиқди
Хитойда содир бўлган кутилмаган бир воқеа кўпчиликни ҳайратга солди. Хунан провинциясида яшовчи Лю фамилияси билан танилган эркак кечки овқат учун ўзи парваришлаган ўрдакни сўйиб, уни тозалаётган пайтда ошқозон ичида ялтироқ заррачаларни пайқаб қолди. Кейин маълум бўлишича, бу оддий жисмлар эмас, балки қиймати тахминан 12 минг юан, яъни қарийб 1740 долларга тенг бўлган олтин зарралари бўлиши мумкин.
Дастлаб Лю бу нарсаларни майда тошча ёки металл бўлаклари, деб ўйлаган. Аммо уларнинг ғалати ялтираши унда шубҳа уйғотган. Маҳаллий хабарларга кўра, топилган заррачаларнинг умумий оғирлиги қарийб 10 граммни ташкил этган. Эркак уларнинг ҳақиқийлигини текшириш учун энг оддий усуллардан бирига қўл урган — оловда қиздириб кўрган. Заррачалар рангини ўзгартирмаганидан сўнг, у бу ҳақиқатдан ҳам олтин бўлиши мумкин, деган хулосага келган.
Бироқ ҳозирча бу топилма расман тўлиқ тасдиқлангани йўқ. Лунхуй ҳудудидаги табиий ресурслар идораси мутахассислар қўшимча экспертиза ўтказиши кераклигини билдирган. Яъни воқеа жуда қизиқарли кўринса-да, расмий нуқта қўйиш учун яна текширув зарур. Қисқаси, ҳозирча “ўрдакдан олтин чиқди” деган гап сенсация даражасида турибди, лекин бюрократия ҳам ўз ролини ўйнаяпти.
Мутахассислар бу ҳолатни мутлақо ғайритабиий, деб ҳисобламаяпти. Чунки Хунан провинцияси минерал бойликлари билан машҳур ҳудудлардан бири саналади. Атрофдаги дарё чўкиндиларида табиий олтин зарралари учраши мумкинлиги айтилмоқда. Қолаверса, 2024 йилда Хунаннинг Пинжианг туманида жойлашган Вангу кони атрофида 300 тоннадан ортиқ олтин захираси аниқлангани, янада чуқур қатламларда эса 1000 тоннадан зиёд захира бўлиши мумкинлиги ҳақида ҳам хабарлар тарқалган эди.
Эҳтимолга кўра, ўрдак дарё бўйларида ва лойқа ерларда озуқа излаб юрган пайтда қум, майда тошлар ва турли заррачалар билан бирга олтин парчаларини ҳам ютиб юборган. Вақт ўтиши билан улар қушнинг ошқозонида тўпланиб қолган бўлиши мумкин. Ана шу жиҳат воқеани янада қизиқ қилади: оддий қишлоқ хўжалиги манзараси бир зумда “бойиб кетиш” ҳақидаги сюжетга айланиб қолди.