Тошкентдаги баҳсли қурилиш ишлари юзасидан суд қарори
Тошкент шаҳар маъмурий судида Ҳамид Олимжон майдонидаги машҳур 18 қаватли уйлар реконструкцияси билан боғлиқ иш бўйича апелляция шикояти кўриб чиқилди. 2026 йил 28 февраль куни суд аҳолининг талабларини қаноатлантирмади ва аввалги қарорни ўз кучида қолдирди. Можарога сабаб бўлаётган асосий омил Вазирлар Маҳкамасининг 2025 йил 7 ноябрдаги 707 сонли ёпиқ қарори ҳисобланади. Бу ҳақда anhor.uz хабар беради.
Эслатиб ўтамиз, 2025 йил 13 октябрда саккизта кўп қаватли уйда яшовчи 220 нафар фуқаро президент, шаҳар ҳокими ва бош прокурорга мурожаат қилган эди. Аҳоли биноларнинг фасад қисмини таъмирлаш ишларини лойиҳа-смета ҳужжатлари тасдиқланмагунча тўхтатиб туришни талаб қилган. Бироқ суд жараёнида ҳокимият вакиллари тақдим этган ҳужжатлар, хусусан, "Ягона буюртмачи хизмат инжиниринг компанияси" ва "Лаурис Деcоратион Буилд" МЧЖ ўртасидаги шартнома ҳамда ёпиқ қарор асосида ишлар қонуний деб топилди.
Аҳоли вакилларининг сўзларига кўра, суд жараёнида "хизмат доирасида фойдаланиш учун" (ДСП) грифи остидаги ҳужжатлар сир тутилгани сабабли улар ўз ҳуқуқларини тўлиқ ҳимоя қила олишмаган. Мазкур ёпиқ қарор буюртмачига электрон савдоларсиз ва жамоатчилик муҳокамасисиз пудратчини танлаш, шунингдек, экспертиза хулосаларисиз ҳам қурилиш ишларини молиялаштириш ҳуқуқини беради. Аҳоли эса шаффофлик йўқлиги ва меъморий қиёфанинг бузилиши хавфидан хавотирда эканини таъкидламоқда.