Бахтиёр Саидов Туркия президенти билан учрашди
Ўзбекистон ташқи ишлар вазири Бахтиёр Саидов Истанбул шаҳрида Туркия президенти Ражаб Тоййиб Эрдоған билан учрашув ўтказди. Мазкур мулоқот чоғида Ўзбекистон раҳбари Шавкат Мирзиёевнинг самимий саломлари ва эзгу тилаклари Туркия етакчисига етказилди. Томонлар икки давлат ўртасидаги биродарлик ришталари барча соҳалардаги ҳамкорлик учун мустаҳкам пойдевор бўлиб хизмат қилаётганини алоҳида таъкидлашди.
Ташриф доирасида Бахтиёр Саидов Туркия ташқи ишлар вазири Ҳакан Фидан ҳамда Озарбайжон ташқи ишлар вазири Жейҳун Байрамов билан ҳам алоҳида музокаралар олиб борди. Учрашувларда Яқин Шарқдаги мураккаб вазият ва унинг минтақавий хавфсизликка таъсири юзасидан атрофлича фикр алмашилди.
Шунингдек, Ўзбекистон ташқи ишлар вазири Туркий давлатлар ташкилоти Ташқи ишлар вазирлари кенгашининг йиғилишида иштирок этди. Тадбирда минтақавий ва глобал хавфсизликка қарши туриш, туркий давлатлар ўртасидаги бирдамликни кучайтириш масалалари кун тартибидан ўрин олди. Ўзбекистон томони ташкилот доирасидаги амалий ҳамкорликни чуқурлаштириш, барқарорликни таъминлаш ва ўзаро боғлиқликни ривожлантиришга қаратилган барча ташаббусларни қўллаб-қувватлашини яна бир бор тасдиқлади.