Қашқадарёлик ёш шоира Президент совғаси билан тақдирланди
Ўзбекистон Республикаси Президентининг тегишли қарорига биноан, юртимизнинг бир гуруҳ фаол ва ташаббускор қизлари Зулфия номидаги Давлат мукофоти билан тақдирланди. Улар орасида Қашқадарё вилояти Косон туманида истиқомат қилувчи истеъдодли шоира Латофат Амирова ҳам бор.
Ёш ижодкорнинг адабиёт соҳасидаги ютуқлари ва ижодий салоҳияти давлатимиз томонидан юксак баҳоланди. Президент топшириғига асосан, шоирага Самарқанд шаҳрининг Қорасув массивидан барча қулайликларга эга, замонавий мебеллар билан жиҳозланган икки хонали уй совға қилинди.
Уй калитларини топшириш маросимида вилоят ҳокими Адиз Бобоев иштирок этди. Ҳоким ёш шоирани эришган ютуқлари билан қутлаб, унга келгуси ижодий фаолиятида зафарлар тилади. Мазкур эътибор ёшларнинг илм-фан, маданият ва санъат соҳаларидаги интилишларини қўллаб-қувватлаш ҳамда уларни рағбатлантиришда муҳим аҳамият касб этади.