Агляд прэсы: нязручны момант
Блакаванне мяжы Беларусі – як план ЕЗ па спыненні грузавых аўтамабіляў ў Расею. Венгрыя і ЕЗ узялі курс на канфрантацыю. Сіла і слабасць Савета бяспекі ААН. Ці ўдасца Макрону перамагчы зноў? Падрабязнасці свежых матэрыялаў замежнай прэсы даведаемся ў аглядзе Вольгі Сямашкі.
![](https://www.racyja.com/wp-content/uploads/2022/04/2022-04-08_volha_siamashka_ahliadsmi_foty.jpg)
«Украінскія і польскія актывісты плgнуюць блакаду важнага памежнага пераходу паміж Польшчай і Беларуссю, каб спыніць рух грузавікоў, якія накіроўваюцца на ўсход ад Эўразвязу», – перадае еўрапейскае выданне Politico.
Паводле выдання, блакада павінна пачацца ў пункце Кукурыкі бліжэй да выходных і можа доўжыцца 10 дзён.
«Кожны грузавік, які перавозіць тавары ў Расею, азначае грошы на падтрымку расейскай эканомікі і арміі, і ўкраінскія актывісты Еўрамайдану-Варшава жадаюць, каб гэта скончылася. Запланаваны пратэст адбываецца ў той час, калі Варшава і іншыя краіны Цэнтральнай Еўропы ўзмацняюць ціск на Брусэль, каб забараніць большую частку наземнага транспарту паміж ЕЗ, Беларуссю і Расеяй. Еўрапейская камісія прапанавала блакаваць расейскіх і беларускіх аўтаперавозчыкаў у рамках новага раунда санкцый пасля ўварвання Расіі ва Украіну і апошніх паведамленняў аб зверствах, нібыта здзейсненых расійскімі войскамі», – адзначае еўрапейскае выданне.
Паводле матэрыялу, раней на гэтым тыдні актывісты таксама заблакавалі аўтастраду А2 у Польшчы каля польска-нямецкай мяжы, звярнуўшыся да канцлера Германіі Олафа Шольца з просьбай «спыніць фінансаванне ваенных злачынстваў». Польскі ўрад заклікаў забараніць перавозкі грузаў у Беларусь і Расею, але заяўляе, што для дзеяньняў яму патрэбны дазвол Эўракамісіі. Пакуль гэтага не адбудзецца, Варшава заяўляе, што правярае кожны грузавік, каб пераканацца, што ён не перавозіць кантрабанду. Польскія ўлады заяўляюць, што з пачатку вайны аб’ёмы руху ў Беларусь скараціліся ўдвая.
Будапешт не мае намеру падтрымліваць больш жорсткія санкцыі супраць Расеі, запланаванае Еўракамісіяй. Прэм’ер-міністр Віктар Орбан, толькі што пераабраны на новы тэрмін, заявіў у сераду, што разглядае абмежаванні на закупку расейскай нафты і газу як нейкую чырвоную мяжу. Незадоўга да гэтага старшыня Еўракамісіі фон дэр Ляен заявіла аб намеры ЕЗ прымяніць да Венгрыі механізм абароны вяршэнства права.
«Як толькі перад грамадзянамі Венгрыі замаячыць пагроза выхаду краіны з ЕС, Орбан больш не зможа спадзявацца на іх падтрымку», – мяркуе румынская газета Spotmedia.
«Орбан, напэўна, ператворыць рашэнне ЕЗ у наратыў, у адпаведнасці з якім Венгрыю караюць, таму што яна, маўляў, прагаласавала не так, як хацелі лідэры ЕЗ. Аднак О рбану будзе не так проста паставіць усё на карту ці нават справакаваць выхад краіны з Еўразвяза, паколькі грамадзяне такога рашэння не падтрымаюць. Орбан ведае, што хоць венгры і рады атрымліваць танны газ, калі б ён быў нават расейскім, але ў выпадку венгзіту, які ні ў якім разе не быў бы эканамічна выгадным, ад іх падтрымкі не застанецца і следу», – адзначае румынскае выданне.
На фоне зверстваў у Бучы прэзідэнт Зяленскі абвінаваціў Савет Бяспекі ААН у бяздзейнасці і заявіў, што без рэформаў яму давядзецца «самараспусціцца». Дэбаты аб сіле і бяссіллі ААН у плане вырашэння ўзброеных канфліктаў, якія вядуцца ўжо на працягу дзесяцігоддзяў, разгарэліся з новай сілай.
«Можна толькі пагадзіцца з крытыкай, выказанай у адрас ААН прэзідэнтам Зяленскім», – піша шведская газета Expressen.
«Зяленскі мае рацыю ў тым, што вайна Пуціна пагражае не толькі Украіне, але і ўсяму заснаванаму на правілах сусветнаму парадку. Без міжнародных прававых прынцыпаў мы будзем адкінутыя назад у часы, калі пераважаў закон наймацнейшага. Змрочная будучыня для такіх маленькіх краін, як Швецыя. На жаль, відавочна, што ААН не спраўляецца з міжнароднымі канфліктамі, калі ў іх задзейнічана тая ці іншая буйная дзяржава. У новую эпоху вялікадзяржаўнай палітыкі гэта не абяцае нічога добрага», – адзначае шведскае выданне.
Па выніках апошніх апытанняў грамадскай думкі Эманюэль Макрон губляе сваю перавагу перад Марын Ле Пэн. Паводле апытання, праведзенага ў нядзелю, дзейны прэзідэнт карыстаецца падтрымкай 27 працэнтаў электарату, а кандыдатка ад Нацыянальнага аб’яднання можа разлічваць на 22 працэнты. Як адзначаюць еўрапейскія аглядальнікі, на фоне такога раскладу ёсць усе падставы баяцца магчымай перамогі Ле Пэн у другім туры галасавання.
«Як левыя, так і правыя выбаршчыкі могуць адмовіцца галасаваць за Макрона», – піша італьянская газета La Stampa.
«Калі ў 2017 годзе ніхто не паставіў бы і цэнта на перамогу спадчынніцы харызматычнага Жана-Мары Ле Пэна, гэтага дуча ўльтраправых, які ўжо пайшоў у гісторыю, то сёння французскае грамадства здаецца менш згуртаваным. Калі «сістэма» пагодзіцца з Макронам і яго ідэяй «дзяржавы-стартапа’», што скажа народ? Як адзначае Le Monde, праз пяць гадоў Макрон застаецца ўсё такім жа незразумелым і выслізгваючым, і цяпер перад ім стаіць палітычны парадокс: ці не аб’яднаюцца правыя і левыя выбаршчыкі супраць прэзідэнта, які заявіў, што не прадстаўляе ні тых, ні іншых?», – адзначае італьянскае выданне.
Агляд сусветнай прэсы падрыхтавала Вольга Сямашка