Анджэй Дуда: Незалежныя Ўкраіна і Беларусь надзвычай важныя для незалежнай Польшчы
«Незалежная Ўкраіна і незалежная Беларусь надзвычай важныя для незалежнай Польшчы, для бясьпекі нашых межаў, а мы, палякі, заўсёды ставімся да нашых межаў як да сьвятыні», — заявіў падчас выступу на парадзе з нагоды Дня Войска Польскага 15 жніўня ў Варшаве прэзыдэнт Польшчы Анджэй Дуда.
Ён зазначыў, што на працягу ўсёй гісторыі Польшчы яе межы падвяргаліся нападам, і польскія салдаты пралівалі кроў, абараняючы іх, «таму мы добра ведаем, што абарона межаў — гэта адна з абсалютных асноваў незалежнасьці».
«Усе ў Польшчы мусяць зразумець, што ўвесь час супраць нас робяцца і будуць рабіцца розныя правакацыі. Такі цяпер час, таму мы мусім быць у пастаяннай гатоўнасьці», — падкрэсьліў пры гэтым Дуда.
Пасьля зьяўленьня ў Беларусі наймітаў расейскай ПВК «Вагнэр» Польшча заявіла пра намер умацаваць межы, а менавіта Сувалкскі калідор і «Берасьцейскую браму», якія зьяўляюцца «адчувальнымі пунктамі». Сувалкскім калідорам неафіцыйна называюць сухапутны калідор паміж Беларусьсю і Калінінградзкай вобласьцю РФ, названы так па разьмешчаным на ім польскім горадзе Сувалкі, «Берасьцейскай брамай» — участак польскай і беларускай зямлі паміж рэкамі Нараў і Заходні Буг.
Раней Польшча заявіла пра перакіданьне каля 10 тысяч вайскоўцаў у падмацаваньне аховы польска-беларускай мяжы. Гэта было зьвязана з актыўнасьцю ПВК у Беларусі і вучэньнямі вагнэраўцаў каля польскай мяжы.