Беларусь разлічвае атрымаць міжнародную фінансавую дапамогу?
Урад Беларусі ў 2025 годзе разлічвае атрымаць міжнародную дапамогу на стварэнне інфраструктуры на граніцы. Гэтыя працы спыніліся пасля пачатку поўнамаштабнай вайны ва Украіне, калі рэжым Лукашэнкі падтрымаў расейскае ваеннае ўварванне.
Цяпер Савет міністраў Беларусі зацвердзіў аб’ёмы і крыніцы фінансавання дзяржаўнай праграмы па стварэнні інфраструктуры пунктаў пропуску на дзяржаўнай граніцы. Паводле планаў, у 2025 годзе плануецца прыцягнуць 52,5 мільёна рублёў міжнароднай тэхнічнай дапамогі. Агульны кошт адпаведнай праграмы складае 225,3 мільёнаў рублёў. У 2021 годзе Беларусь у межах гэтай праграмы паспела атрымаць амаль 62 мільёна на пагранічную інфраструктуру, але ў 2022 годзе міжнародныя арганізацыі спынілі свой удзел у гэтай праграме, піша Радыё Свабода.
Лукашэнка прызначыў Чабатара міністрам эканомікі
Аляксандр Лукашэнка прызначыў 4 студзеня Юрыя Чабатара міністрам эканомікі Беларусі. Да нядаўняга часу гэтую пасаду займаў Аляксандр Чарвякоў, якога летась у лістападзе прызначылі паслом Беларусі ў Кітаі
Юрый Чабатар больш за 20 гадоў працуе ў сістэме Міністэрства эканомікі. Выпускнік Беларускага дзяржаўнага эканамічнага ўніверсітэта. Апошнія месяцы быў выконваючым абавязкі міністра эканомікі, у гэты час заявіў, што расейскія інвестыцыі ў беларускія прадпрыемствы выраслі на 140%. Пры ім быў арганізаваны першы інвестыцыйны форум Беларусі на тэрыторыі РФ.
Яшчэ ў 2021 годзе Чабатар заяўляў, што даходы насельніцтва краіны вырастуць на 20% да 2025 года.
Беларусбанк пачаў выдаваць крэдыты на айчынныя тавары пад 4%
З 4 студзеня Беларусбанк запусціў новы крэдыт на спажывецкія патрэбы пад назвай “На родныя тавары”. Як гаворыцца на сайце банка, зроблена гэта з мэтай стымулявання гандлю таварамі беларускіх вытворцаў.
Крэдыт будзе выдавацца на тры гады пад фіксаваную на ўвесь тэрмін стаўку 4% гадавых для набыцця тавараў беларускіх вытворцаў. Гэта мэбля, халадзільнікі і маразільнікі, пральныя, кухонныя, пасудамыйныя машыны, ровары, мапеды, матацыклы, тэлевізары, мотаблокі, міні-трактары і іншае.
Максімальная сума крэдыту залежыць ад плацежаздольнасці заяўніка, але не можа перавышаць 300 базавых велічынь, цяпер гэта 12 тысяч рублёў. Крэдыт выдаецца безнаяўным пералічэннем на рахункі прадаўцоў, паведамляе nashaniva.com.
У Беларусі ў 23 раёнах “напружаная сітуацыя на рынку працы”
У Беларусі ў 23 раёнах “напружаная сітуацыя на рынку працы”. Дакумент, які змяшчае адпаведныя дадзеныя, апублікаваны на Нацыянальным прававым інтэрнэт-партале.
Найбольш у спісе прадстаўлена раёнаў Віцебскай вобласці (восем): Бешанковіцкі, Верхнядзвінскі, Пастаўскі, Расонскі, Сенненскі, Ушацкі, Чашніцкі і Шумілінскі. На другім месцы Магілёўская вобласць, дзе сем раёнаў маюць сур’ёзныя праблемы на рынку працы. На трэцім месцы – Гомельская вобласць. У Берасцейскай вобласці напружаная сітуацыя ў Івацэвіцкім і Маларыцкім раёнах, у Гарадзенскай і Менскай абласцях — у Дзятлаўскім і Вілейскім раёнах адпаведна, піша pozirk.online.
Беларускае Радыё Рацыя.
Фота з адкрытых крыніц.