4,7 миллиард сом лур ду Оьрсийчоьно Нохчийчоьнна керла аэропорт ян
Дийцарехь, аэропортан проект хIоттон ахча лур ду кхушара, ша гIишло йийр ю 2022–2024 шерашкахь.
Кхин а 9 миллиард гергга сом оьшур ду, Нохчийчуьрчу Iедало динчу хьесапашца, аэропортехь оьшу гIишлош тIеян.
Лурчаха махкарчу Iедало динчу хьесапца, аэропорт ян оьшу аьлла кхайкхийна терахь дара 16 миллиард сом.
Керла терминал юьллур ю Соьлж-ГIаларчу аэропортана гена доццуш.
Пандеми яржжалц йолчу заманахь аэропорте дуьссура, циггара доьлхура кеманаш Москва, Петербурге, Туркойчу, Киргизе, Эмираташка. Стохка аэропортехула чекхваьлла ах миллион гергга пассажир.