Соьлжа-гIаларчу поликлиникина мах белла эцначу совгIатах дозалла до нохчийн Iедалхоша
Соьлжа-гIалара номер 4 йолчу поликлиникина "Оьрсийчоьнан тоьлла могушалла Iалашйаран хьукматаш" категорехь совгIат дина – цуьнан гурашкахь цара шаьш "хьалхататтарна" а, цунах "социал-зерийн НИИ-на" богIу мах дIабаларна а. Амма иза ишта доллушехь, Нохчийчоьнан Iедалхоша дукха сиха меттигерчу лоьрийн а, республикерчу могушаллин урхаллийн а "белхан лаккхара тIегIа" гойтуш хилам бу иза аьлла, дIахьедар дира.
"Социал-зераш НИИ", хууш ма - хиллара, Санкт-Петербургехь регистраци йина йу доза тоьхна жоьпалла долу юкъаралла (ООО) санна.
"Оьрсийчоьнан тоьлла хьукматаш" аьллачу категорехь дакъалацарна ахча луш хилар а, "шаьш хьалхатеттинчарна" и совгIат луш хилар а цу цхьаьнакхетараллин сайтехь билгалдаьккхина ду.
Чиллин-беттан йуккъехь республикан куьйгалхо Кадыров Рамзана дакъалоцуш, Нохчийчохь дIабаьхьира парламентан рогIера гулам. ДIахьедарш деш вистхилира масех хьаькам. Царех цхьаъ Алханов Адам - бахархойн дахар тадаларехь республика Оьрсийчоьнан регионашлахь 8-чу метте йаьлла аьлла дийцира цо. "Агентство стратегических инициатив" (АСИ)- цхьаьнакхетараллин керлачу талламашца доьзна ду шен къамел элира цо. Амма билгал ца даьккхира, и зераш адамашка хеттарш дарна тIехь хIиттош хилар. Эксперташа а, федералан зераша а и тайпа дIахьедарш харц лору.
Нохчийчуьрчу яккхийчу а, кегийрачу а гIаланашкахь Оьрсийчохь долучарех уггаре лахара алапаш хилар хьахийна ду "РИА Рейтинг" агенталлин керлачу талламехь, Росстатан жамIашна тIетовжарца.
Зазадоккху-беттан 13-хь Путин Владимира Кремлехь тIеийцира Кадыров Рамзан. Цхьана шарчохь кхоалгIа цхьаьнакхетар дара иза. Цигахь Кадыровс дийцира, дIадаханчу шарахь Нохчийчоьно хьалхара меттигаш баьхна дукхачу рейтингашкахь бохуш. "Пачхьалкхан программаш кхиамца кхочушйарах а, "Кхерамзалле, дика некъаш" къоман проектех а, "Iилма" а, "ГIишлош, Эвсара гIалин среда а, "Экологи" къоман проекташ кхолларах а, цу йерриге рейтингашкахь республика хьалхарчу меттигашкахь хиларх а. Цул совнаха, 2022-чу шарахь инвестицийн тIегIа лакхайаьлла а элира. Амма стохка Нохчийчоь белхазаллин терахьца а, некъаш тIехь ДТП-хь кхалхаршца а, банкроташ хиларехь а, хьехархойн алапаш лахара хилар тIехь а, нехан банкашкахь ахчанаш кIезга хиларехь а, иштта кхин дIа а, нехан таронаш ледара хиларехь, пенсийн барамаш кегий хиларехь а, республика хьалхарчу меттехь латтар Кадыров Рамзана хьаха а ца дира.