Դանիայի իշխանությունները ևս մտադիր են արգելել նիկաբն ու բուրկան
Դանիայի իշխող լիբերալ-պահպանողական կոալիցիան մտադիր է արգելել հանրային վայրերում դեմքը ծածկող հագուստ կրելը:
Ինչպես հաղորդում է DW.com-ը, Լիբերալ դաշինքի առաջնորդ Անդերս Սամուելսենը հայտնել է, որ երկրի խորհրդարանում նման արգելքի սահմանման կողմնակիցները մեծամասնություն են կազմում: Վերջինս հավելել է, որ իր կուսակցությունը կպաշտպանի այդ նախաձեռնությունը:
«Բուրկան կանանց ծայրահեղ ճնշման արտահայտությունն է», - գրել է քաղաքական գործիչն իր ֆեյսբուքյան էջում: Պահպանողական ժողովրդական կուսակցությունը, որն իշխող կոալիցիայի երրորդ անդամն է, ևս կողմ է այդ առաջարկին:
Արգելքը կվերաբերի ոչ միայն ավանդական մուսուլմանական հանդերձանքի տարրերին, այլև բժշկական դիմակներին, ծաղրածուի դիմահարդարմանը և այլ դիմակների:
Հիշեցնենք, որ օրեր առաջ նմանատիպ օրենք էր ընդունվել Ավստրիայում, որով արգելվում է հանրային վայրերում դեմքը ծածկող հանդերձանք կրել: