«Երկիր Ծիրանին» թողնում է, որ համահայկական ընդվզման օրը հանրությունը որոշի, իսկ մինչ այդ, ըստ Զ. Փոստանջյանի՝ մարդկանց ցանցային պայքարի են նախապատրաստում
«Երկիր Ծիրանի» կուսակցությունն այսօր ասուլիս էր հրավիրել ամփոփ ներկայացնելու համահայկական, համազգային ընդվզման քարոզարշավի իրազեկման նախնական փուլը և ապագա գործողությունները:
Կուսակցության նախագահ Զարուհի Փոստանջյանը հայտարարեց, թե նախապատրաստում են ցանցային պայքար սկսել, որպեսզի խոցելի չլինեն: Ըստ նրա` շրջելով հայաստանյան գյուղերով ու քաղաքներով, երիտասարդների մեջ գտել են համախոհներ, այնուհետև երկրորդ փուլով կաշխատեն այդ երիտասարդների հետ, ովքեր համամիտ են իրենց կողմից առաջարկված քաղաքական համակարգին: Երրորդ փուլով նախատեսում են համացանցային քարոզարշավ իրականացնել:
«Ցանցային երրորդ փուլն իր մեջ ներառելու է նաև շրջագայությունը հայ օջախներով, ցանցը հաստատելու ենք և պայքարը տանելու ցանցային միջոցներով, քանի որ այս քաղաքական պայմաններում հեշտ է ձախողել սկսած գործը, և խմբին կամ անձին ճնշելու փորձից ելնելով և նախորդ փորձերը վերլուծելով, պետք է լինի ցանցային պայքար, որ չլինի մեկ առաջնորդ կամ առաջնորդող խումբ: Հայաշատ քաղաքներում ևս պետք է լինեն ընդվզման գործընթացներ բողոքներ, որ չեն ճանաչում այս ապօրինի իշխանությանը, հայտ են ներկայացնում նոր քաղաքական համակարգի»,-ասաց նա:
Դիտարկմանը, թե այսինքն՝ բուն ընդվզման գործողությունները կարող են բավական երկար ժամանակ հետաձգվել, մինչև ցանցի ստեղծումը, Փոստանջյանը պատասխանեց. «Մի քանի հարյուր տարի չենք յուրացրել ազատական արժեքները և չեմ կարծում, որ շատ երկարաժամկետ լինի, այդուհանդերձ պարտավոր ենք գաղափարները ներկայացնել և որպես ազգ ներկայացնել պատմական քաղաքական հայտ: Իհարկե, ուշացել եք, բայց չի նշանակում, որ չենք կարողանալու ներկայացնել մեր ծրագրերն ու իրականացնել դրանք»,-ասաց նա:
Իսկ այն, որ ավելի վաղ ասել էր, թե ընդվզումը տարեվերջին է լինելու, և օրը հայտնի է, Զարուհի Փոստանջյանը պատասխանեց, թե սխալ է օրվա մասին հայտնել:
«Ուզում ենք, որ հնարավորինս արագ տեղի ունենա, հանրությունը ինքնակազմակերպվի, բայց հանրությունը պետք է ժամադրի օրը, տեղը, մեր խնդիրն է հանրությանը պատրաստել, գաղափարախոսությունը ներկայացնել, իսկ հանրությունն ինքն իր մեջից հայտնի և՛ ժամը, և՛ օրը»,-ասաց նա:
Հարցին, թե այլ քաղաքական ուժերի հետ համագործակցության հնարավորություն կա՞, Զարուհի Փոստանջյանը պատասխանեց, թե այս պահի դրությամբ քաղաքական դաշտում գործընկեր չունեն: «Եթե մեր սկզբունքը, գաղափարը և ծրագիրը կիսում են, հնարավոր է, որ համագործակցենք»,-ասաց նա:
Իսկ մինչ այդ Փոստանջյանն անդրադարձավ մարզային այցելություններին, որը մեկնարկել էր սեպտեմբերի 21-ից հետո` Շիրակի մարզի Աշոցք գյուղից և ավարտվել Սյունիքի մարզում: «Նույն պատկեր էր` լքված գյուղեր, քաղաքներ, մարդիկ արտագաղթել են՝ հիմնականում դեպի ՌԴ, իսկ կվերադառնան, թե ոչ, պարզ չէ: Ասում էին, որ նաև ուղարկվող գումարներն են պակասել»,-ասաց նա: Փոստանջյանը հետաքրքրվել էր, թե ինչ են պատրաստ անել քաղաքական վիճակը փոխելու համար, քաղաքացիներն ասել էին, որ հյուսները կտրել են, բայց ունեն սպասումներ և եթե ինչ-որ խումբ կամ անձ այդ սպասումը կյանքի կկոչի, երջանիկ կլինեն:
«Հիմա մենք կապ ենք հաստատել բոլոր քաղաքների հետ, ունենաք արձագանքներ»,-ասաց նա:
Հարցին, թե հաջողելու դեպքում կարելի՞ է ենթադրել, որ ՀՀԿ-ն արգելվելու է որպես կուսակցություն, Փոստանջյանը պատասխանեց, որ իրավաբանորեն պետք է հարցը քննարկվի, քանի որ վնասը հսկայածավալ է:
«Նրանք պետք է կանգնեն դատարանի առջև, նաև ես եմ դատի տալու,բայց այլ մարդիկ էլ կգտնվեն»,-ասաց նա: