Մեր գործը ներդրող բերելը չէ, այլ տնտեսական բարեփոխումներին աջակցելը, որը կնպաստի ներդրումներին. Ռազմավարական կենտրոնի տնօրեն
Ռազմավարական նախաձեռնությունների կենտրոնի գործադիր տնօրեն, վարչապետի խորհրդական Ալեքսանդր Խաչատուրյանն այսօր մամուլի ասուլիսին ներկայացնելով կենտրոնի աշխատանքները, ասաց, որ հիմա 26 ծրագիր ընթացքի մեջ է:
Նա նշեց, որ ծրագրերը վերաբերում են տեխնոլոգիական, զբոսաշրջության, կրթության, հարկային և մաքսային, պետական կառավարման ոլորտներին, ներդրումային միջավայրի բարեփոխումներին: Խոսելով Կայուն զարգացման նպատակների Ազգային նորարարական կենտրոնի ստեղծման մասին, նա նշեց, որ այն համարում է «ստարտափը՝ ստարտափի մեջ»:
Անդրադառնալով ֆինանսավորմանը` նա ասաց, որ տեխնիկական աջակցության՝ նպատակային համատեղ ծրագրերի իրականացման համար ստացել են 3,1 միլիոն դոլար, կառավարությունից 500 միլիոն դրամ՝ ընթացիկ գործունեություն ֆինանսավորելու համար և բանակցություն են վարում ևս 3.5 միլիոն աջակցություն ստանալու համար: «Մեր միսիան ֆունկցիայով չենք սահամանափակում, փորձում ենք տեսնել, թե որտեղ ինչ դերակատարություն կարող ենք ունենալ»,-ասաց նա:
Ինչ վերաբերում է ներդրումներ բերելուն, ապա Ալեքսանդր Խաչատուրյանն ասաց, որ կենտրոնի գործը ներդրող բերելը չէ,այլ տնտեսական բարեփոխումներին աջակցելը, որը կնպաստի ներդրումներին: «Մեզ պետք է լավ օրենսդրություն, որ ծրագրերը իրականացվեն, կան կազմակերպություններ, որոնք ցանկանում էին գործունեություն ծավալել, սակայն օրենսդրությունը լավը չէր, դրա համար էլ չարեցին»,-ասաց նա:
Որպես խորհրդական նա ասաց, որ ինքն անձամբ հինգ-վեց ներդրողի հետ շփվել է, որոնք ցանկանում են ներդրումներ անել, և նրանք Հայաստանում չեն գտնվում: Նա նշեց, որ իր անձնական կարծիքով՝ ներդրումները արագ չեն լինում, առավել ևս, երբ ներդրողները Հայաստանի հետ կապ չունեն: «Մենք հեղաշրջում չենք արել, նոր մոդել ենք իրականացրել, որտեղ պետություն- մասնավոր հատվածի համագործակցելով նոր միջավայր է ստեղծվում: Սա հարթակ է, որտեղ մասնավորը գալիս է և պետության հետ ծրագրեր է մշակում»,-ասաց նա և նշեց, որ 19 ուղղություն են ֆիքսել, որին ցանկանում են հասնել:
Ինչ վերաբերում է կառույցի 9 ամսվա աշխատանքների վերաբերյալ իր գնահատականներին և հարցին, թե վարչապետի ասած «հուպ տալը» հաջողվե՞ց, կենտրոնի գործադիր տնօրենն ասաց` կախված է նրանից, թե «հուպ տալու» տեսանկյունից ինչ ակնկալիքներ կան: «Մեր աշխատողները աշխատում են շաբաթական 70 ժամ, որը մեկ ու կես անգամ ավելի շատ է, քան օրենքում սահմանված է: 22 հոգով 26 պրոդուկտ ենք տանում, արդեն արդյունքներ տվել ենք»,-ասաց նա և նշեց, որ ստեղծման ժամանակ առանց համակարգչի արդեն արդյունք են տվել:
«Ես կարծում եմ, որ մենք այն թիմը չենք դառել, որը կուզենանք լինել, բայց արագ գնում ենք և հասնելու ենք դրան»,-հավելեց նա: