Մեծ Բրիտանիայի վարչապետի պաշտոնի համար պայքարը եզրափակիչ փուլում կշարունակեն նախկին և ներկայիս արտգործնախարարները
Մեծ Բրիտանիայի ԱԳ նախկին նախարար Բորիս Ջոնսոնը և ներկայիս արտգործնախարար Ջերեմի Հանթն անցել են Պահպանողական կուսակցության առաջնորդի և երկրի վարչապետի պաշտոնի համար պայքարի ավարտական փուլ:
ТАСС գործակալության փոխանցմամբ՝ այս մասին վկայում են հինգշաբթի անցկացված քվեարկության հինգերորդ փուլի արդյունքները, որին մասնակցել են բրիտանական խորհրդարանի Համայնքների պալատի պահպանողական պատգամավորները:
Ջոնսոնը ստացել է 160 պատգամավորի աջակցությունը 313-ից՝ հաստատելով առաջատարի դիրքերը: Հանթի օգտին քվեարկել է 77 պատգամավոր:
Շրջակա միջավայրի հարցերով նախարար Մայքլ Գոուվը ստացել է 75 ձայն և դուրս մնացել քվեարկության եզրափակիչ փուլ անցնելուց: Իշխող կուսակցության ղեկավարի և հետևաբար վարչապետի անունը կորոշվի փոստային քվեարկությամբ, որին կմասնակցեն Պահպանողական կուսակցության 160 000 շարքային անդամներ: Քվեարկության համար մեկ ամիս է հատկացվում: Նոր վարչապետի անունը հայտնի կդառնա հուլիսի վերջին: