Բաքուն «անհիմն և ստերով լի» է որակել Արարատ Միրզոյանի՝ Փարիզում արված հայտարարությունները
Արդբեջանի արտաքին գործերի նախարարության մամուլի քարտուղար Այհան Հաջիզադեն արձագանքել է ՀՀ ԱԳ նախարար Արարատ Միրզոյանի՝ ՅՈՒՆԵՍԿՕ-ի գլխավոր համաժողովի 42-րդ նստաշրջանում ունեցած ելույթին՝ «անհիմն» որակելով Ադրբեջանի հասցեին հնչած մեղադրանքները։
«Մենք կտրականապես մերժում ենք 2023 թվականի նոյեմբերի 9-ին Հայաստանի Հանրապետության արտաքին գործերի նախարար Արարատ Միրզոյանի կողմից ՅՈՒՆԵՍԿՕ-ի գլխավոր համաժողովի 42-րդ նստաշրջանում ելույթի ժամանակ Ադրբեջանի հասցեին հնչեցված «անհիմն և ստերով լի» (չակերտները՝ Tert.am-ի) մեղադրանքները», - նշել է ԱԳՆ խոսնակը։
Հաջիզադեն շեշտել է, որ Լեռնային Ղարաբաղի հայերն «ինքնակամ են տեղափոխվել Հայաստան» (չակերտները՝ Tert.am-ի), մինչդեռ հայկական կողմը «կեղծավորաբար շարունակում է մեղադրել Ադրբեջանին էթնիկ զտումների համար, այդ կերպ չարաշահելով միջազգային տարբեր հարթակները» (չակերտները՝ Tert.am-ի)։
Նրա խոսքով՝ «Հայաստանի կողմից նման «անհիմն պնդումները» (չակերտները՝ Tert.am-ի) ուղղակիորեն հակասում են տարածաշրջան այցելած և այս երկրում ակտիվ գործունեություն ծավալող ՄԱԿ-ի մասնագիտացված կառույցների ներկայացուցիչների զեկույցներին ու հայտարարություններին»։
Անդրադառնալով ԼՂ-ում հայկական մշակութային ու պատմական հուշարձաններին սպառնացող վտանգի մասին ՀՀ ԱԳ նախարարի ահազանգերին՝ Հաջիզադեն ընդգծել է, որ Ադրբեջանի ինքնիշխան տարածքներում գտնվող պատմական և կրոնական հուշարձաններն իրենց «ազգային մշակութային ժառանգությունն են և պաշտպանված են՝ անկախ իրենց ծագումից, աշխարհիկ կամ կրոնական պատկանելությունից» (չակերտները՝ Tert.am-ի)։
Անդրադառնալով Լեռնային Ղարաբաղ ՅՈՒՆԵՍԿՕ-ի անկախ փաստահավաք առաքելության գործուղելու Արարատ Միրզոյանի հորդորին՝ Հաջիզադեն Հայաստանին կրկին մեղադրել է ընդդեմ Ադրբեջանի «կեղծ ու զրպարտչական հռետորաբանության» (չակերտները՝ Tert.am-ի) համար՝ նշելով, որ այդ կերպ Հայաստանը «խաթարում է խաղաղության համաձայնագրի հեռանկարները» (չակերտները՝ Tert.am-ի)։
«Հուսով ենք, որ հայկական կողմը բաց չի թողնի տարածաշրջանում խաղաղության հաստատման այս պատմական հնարավորությունը և չի խոչընդոտի տարածաշրջանային կայունության և տնտեսական կայունության ապահովմանն ուղղված ջանքերին, որից կշահի նաև իրեբժնց երկիրը»,- եզրափակել է ԱԳՆ խոսնակը։