ԱՄՆ-ն բարձր է գնահատում ՀՀ ՆԳՆ բարեփոխումները՝ հենվելով նաև միջազգային կառույցների հարցումների արդյունքների վրա
ՀՀ ներքին գործերի նախարար Վահե Ղազարյանը hունվարի 15-ին ընդունել է ԱՄՆ Պետդեպարտամենտի գլոբալ հակակոռուպցիոն համակարգող Ռիչարդ Նեֆյուի գլխավորած պատվիրակությանը։ Ինչպես «Արմենպրես»-ին տեղեկացրին ՀՀ ներքին գործերի նախարարությունից, ՆԳ նախարարը, ողջունելով հյուրերին, բարձր է գնահատել Հայաստանի Հանրապետության և Ամերիկայի Միացյալ Նահանգների միջև ձևավորված վաղեմի, ամուր և արդյունավետ բարեկամական համագործակցությունը, որը հիմնվում է ժողովրդավարության, մարդու իրավունքների և իրավունքի գերակայության ընդհանուր արժեքների վրա։
«Վահե Ղազարյանը ներկայացրել է նախարարությունում և ենթակա ծառայություններում ընթացող բարեփոխումների ընթացքը և հատուկ շնորհակալություն հայտնել ԱՄՆ կառավարությանը՝ բարեփոխումների այս կարևոր ժամանակաշրջանում՝ հատկապես նոր պարեկային ծառայության ստեղծման գործում ներդրած ավանդի, նյութատեխնիկական աջակցության, պարեկային ծառայողների վերապատրաստման գործընթացի կազմակերպման հարցում աջակցություն ցուցաբերելու համար։
ՆԳ նախարարը հաստատել է բարեփոխումները հաջողությամբ ավարտին հասցնելու պատրաստակամությունը, ինչը հնարավորություն կտա ունենալ ժամանակակից մարտահրավերներին դիմակայող, մասնագիտացված ու տեխնիկապես հագեցած, բարեվարք և հարգանքի արժանի ոստիկանություն, ինչպես նաև կապահովի նորաստեղծ Ներքին գործերի նախարարության պատշաճ գործունեության իրականացումը:
Ռիչարդ Նեֆյուն, շնորհակալություն հայտնելով ջերմ ընդունելության համար, պատրաստակամություն է հայտնել աջակցելու նախարարությանը։ Նա բարձր է գնահատել ՆԳ նախարարության և ԱՄՆ դեսպանատան միջև սերտ փոխգործակցությունը և ներկայացրել այցի նպատակը։
ԱՄՆ Պետդեպարտամենտի գլոբալ հակակոռուպցիոն համակարգողին են ներկայացվել ՆԳՆ ներքին անվտանգության և հակակոռուպցիոն վարչության կողմից իրականացվող աշխատանքները՝ նախարարության ենթակա ծառայություններում կոռուպցիոն դրսևորումների բացահայտման, ինչպես նաև դրանց կանխարգելման ուղղությամբ։ Հյուրերին են ներկայացվել նաև միջազգային կազմակերպությունների կողմից իրականացված հարցումների արդյունքները, որոնց ցանկում Հայաստանն ու Երևանը ամենաանվտանգ երկրների ու քաղաքների առաջատար դիրքերում են։
Ռիչարդ Նեֆյուն բարձր է գնահատել ընթացող բարեփոխումները՝ հենվելով նաև միջազգային կառույցների հարցումների արդյունքների վրա»,- ասվում է հաղորդագրության մեջ։
Ըստ աղբոյւրի՝ հանդիպմանը քննարկվել են նաև կոռուպցիայի դեմ պայքարի շրջանակներում հետագա համագործակցության, այդ ուղղությամբ ծառայողների վերապատրաստման և փոխադարձ հետաքրքրություն ներկայացնող այլ հարցեր։