Վենեսուելայում արտակարգ դրություն. Կարակասում պայթյուններ, իշխանությունները մեղադրում են ԱՄՆ-ին
Վենեսուելայի նախագահ Նիկոլաս Մադուրոն արտակարգ դրություն է հայտարարել՝ հայտարարելով, որ Միացյալ Նահանգները հարվածել է երկրի քաղաքացիական և ռազմական օբյեկտներին մի շարք նահանգներում։ Ինչպես հաղորդում են միջազգային լրատվական գործակալությունները, շաբաթ առավոտյան Կարակասում լսվել են ուժեղ պայթյուններ և նկատվել են ցածր բարձրությամբ թռչող օդանավեր։ Քաղաքի հարավային հատվածում, մեծ զինվորական բազայի մոտ, էլեկտրամատակարարումը խափանվել է։
Կառավարության հայտարարության մեջ նշվում է, որ հարվածներ են հասցվել մայրաքաղաքում, ինչպես նաև Միրանդա, Արագուա և Լա Գուաիրա նահանգներում։ Մադուրոն կոչ է արել երկրի սոցիալական ու քաղաքական ուժերին «ակտիվացնել մոբիլիզացիոն ծրագրերը» և դուրս գալ փողոց՝ «մերժելու կայսերական հարձակումը»։
Միաժամանակ, ԱՄՆ-ը առայժմ պաշտոնական մեկնաբանություն չի արել, սակայն ամերիկյան մի շարք լրատվամիջոցներ՝ CBS News-ը և Fox News-ը, անանուն աղբյուրներին հղումով հայտնում են, որ Վաշինգտոնը իրականացրել է հարվածներ Վենեսուելայի տարածքում։
Պայթյունների հետևանքով զինվորական ստորաբաժանումներ և զրահատեխնիկա են տեղակայվել Կարակասի Միրաֆլորեսի նախագահական պալատի շրջակայքում։ Տեղական լուսանկարներում երևում են նաև քաղաքացիներ, որոնք տարհանում են բնակարանները պալատին մոտակայքում։
Պայթյուններից կարճ առաջ ԱՄՆ Ֆեդերալ ավիացիոն վարչությունը արգելել էր ամերիկյան քաղաքացիական թռիչքները Վենեսուելայի օդային տարածքում՝ «զինվորական գործողությունների հետ կապված վտանգների» պատճառով։
ԱՄՆ-ի հնարավոր հարձակումն ընդդեմ Վենեսուելայի միջազգային փորձագետները կապում են միաժամանակ մի քանի գործոնի հետ․ Վաշինգտոնը տարիներ շարունակ Մադուրոյի իշխանությանը դիտարկում է որպես ոչ լեգիտիմ և փորձում է ուժեղացնել քաղաքական ճնշումը ռեժիմի վրա, գործողությունները ներկայացնելով թմրանյութերի ապօրինի շրջանառության դեմ պայքարի շրջանակում։ Բացի այդ, հարցը ունի էներգետիկ ու աշխարհաքաղաքական ենթատեքստ․ Վենեսուելան հսկայական նավթային պաշարներ ունի և սերտ հարաբերություններ է պահպանում ԱՄՆ-ի մրցակից երկրների՝ Ռուսաստանի, Չինաստանի, Կուբայի և Իրանի հետ, ինչի հետևանքով տարածաշրջանում ձևավորվում է ազդեցության պայքար։ Միաժամանակ, վերլուծաբանները չեն բացառվում նաև ներքաղաքական դրդապատճառներ ԱՄՆ-ում՝ ուժի ցուցադրում և արտաքին քաղաքական ներկայության ամրապնդում։
The post Վենեսուելայում արտակարգ դրություն. Կարակասում պայթյուններ, իշխանությունները մեղադրում են ԱՄՆ-ին first appeared on MediaLab Newsroom-Laboratory.