დევიდ კრამერი: ისე ჟღერს, თითქოს ბატონი კობახიძე რუსეთის გამარჯვებას გულშემატკივრობს – ეს სამარცხვინოა

ისე ჟღერს, თითქოს ბატონი კობახიძე რუსეთის გამარჯვებას გულშემატკივრობს და ჩემი აზრით, ეს სამარცხვინოა, – ამის შესახებ „ჯორჯ ბუშის საპრეზიდენტო ინსტიტუტის“ გლობალური პოლიტიკის დირექტორმა, დევიდ კრამერმა „ამერიკის ხმასთან“ განაცხადა, რითაც გამოეხმაურა „ქართული ოცნების“ თავმჯდომარის, ირაკლი კობახიძის განცხადებას, რომ „ომში უპირატესობა ამ ეტაპზე აქვს რუსულ მხარეს“.

„თავიდანვე ვამბობდი და ძალიან ნათელია, რომ არავინ, საერთოდ არავინ ცდილობს საქართველოს რუსეთსა და უკრაინას შორის ომში ჩართვას. საერთოდ არავინ. ამერიკის შეერთებულ შტატებს უკანასკნელი, რაც სურს ისაა, რომ ეს ომი გაფართოვდეს და სხვა ქვეყნებიც მოიცვას. ასე რომ, ეს ისეთი სასაცილო განცხადებაა, რომ საკუთარი თავის უნდა რცხვენოდეს და ამ სასაცილო განცხადებებს თავი უნდა დაანებოს“, – აცხადებს დევიდ კრამერი.

გარდა ამისა, ამერიკის შეერთებულ შტატებში, „ქართული ოცნების“ თავმჯდომარის კიდევ ერთ განცხადებას გამოეხმაურნენ, სადაც ის „გლობალურ ომის პარტიასა“ და საქართველოს ომში ჩართვის ინტერესზე საუბრობს. „ატლანტიკური საბჭოს“ ევრაზიის პროგრამის დირექტორის, ჯონ ჰერბსტის თქმით, „უცნაურია, რუსეთის მიერ ოკუპირებულ ქვეყანაში პოლიტიკოსი აკეთებდეს განცხადებებს მოსკოვის თავდასხმის შესახებ ბახმუტთან დაკავშირებით და „გლობალური ომის პარტიაზე“ საუბრობდეს, რაც კრემლს ახარებს.