ვახტანგ მეგრელიშვილი: ვაპირებთ, ეს ჯარისკაცები ისევ ჯარში წავიყვანოთ ძალით, ისინი ტრეფიკინგის მსხვერპლები არიან
„ჩვენ ვაპირებთ, ეს ჯარისკაცები ისევ ჯარში წავიყვანოთ ძალით. ფაქტობრივად, ისინი ტრეფიკინგის მსხვერპლები არიან, ჩვენივე კანონმდებლობით ვასრულებინებთ იძულებით სამუშაოს“, – ასე ეხმაურება პარტია „გირჩის“ წევრი ვახტანგ მეგრელიშვილი საინფორმაციო სააგენტო pia.ge-სთან ადამიანის უფლებათა დაცვის, სამოქალაქო ინტეგრაციისა და განათლებისა და მეცნიერების ერთობლივ სხდომაზე მომხდარ დაპირისპირებას, სადაც თავდაცვის კოდექსს განიხილავდნენ.
„ეს უკვე მესამე შემთხვევაა, როდესაც ვხვდებით. ჩვენ ვიცით რა კანონპროექტით შემოვიდნენ და შესაბამისად, ჩვენი არგუმენტები თუ კითხვები შეხვედრებზე უკავშირდება სამხედრო სავალდებულო სამსახურს. ჩვენ ვითხოვ ძალიან მარტივ რაღაცას, ჩვენ ვითხოვთ, თუ ვინმეს აღელვებს ჩვენი ბიბლიური თავისუფლება, მაშინ შესაძლებელია, სავალდებულოობა მოიხსნას და ბიბლიური თავისუფლების პრობლემაც ავტომატურად მოიხსნება.
მაგრამ ჩვენ ვაპირებთ, ეს ჯარისკაცები ისევ ჯარში წავიყვანოთ ძალით, ფაქტობრივად, ისინი ტრეფიკინგის მსხვერპლები არიან, ჩვენივე კანონმდებლობით ვასრულებინებთ იძულებით სამუშაოს, მუქარით, მუქარის ქვეშ. ამ კითხვებზე პასუხები უბრალოდ არც „ქართულ ოცნებას“ არ აქვს და მგონია, დედამიწაზეც არ არსებობს ადამიანი, რომელსაც ამ კითხვებზე ექნება მორალური პასუხები. ამის გამო ნერვიულობენ, გაუგებარ რამეებს აკეთებენ. თქვენ თუ გაერკვევით ამ ხალხს რა უნდა, კარგს იზამთ“, – აცხადებს ვახტანგ მეგრელიშვილი.
შეგახსენებთ, ადამიანის უფლებათა დაცვის, სამოქალაქო ინტეგრაციისა და განათლებისა და მეცნიერების ერთობლივ სხდომაზე თავდაცვის კოდექსს განიხილავდნენ, ამ კანონპროექტის განხილვას კი სხდომაზე ხმაური მოჰყვა. ერთმანეთს პარტია „გირჩის“ წევრი ვახტანგ მეგრელიშვილი და უმრავლესობის წარმომადგენელი ვლადიმერ ჩაჩიბაია დაუპირისპირდნენ.