ОСК: Мәжіліс депутаттығынан үміткерлікке өзін-өзі ұсынған 125 адамның өтініші мақұлданбады
"29 бірмандатты округ бойынша 435 кандидат тіркелді. Орташа есеппен алғанда әр мандатқа 15 кандидаттан тиеді. Ең жоғары бәсекелестік – Астанадағы №1 және №2 округтарда байқалды: аталған округтерде 41 және 42 кандидат тіркелген. Алматыдағы №3, №4, №5 округтерде 37, 33 және 34 кандидат тіркелген. Ең төмен бәсекелестік Түркістан облысындағы №25 округте – мұнда 5 кандидат бар" деді орталық сайлау комиссиясы төрағасының орынбасары Константин Петров. Оның сөзінен "Власть" сайты үзінді келтіреді.
Петровтың айтуынша, тіркелген 435 кандидаттың 76-ын жеті саяси партия ұсынған, ал 359-ы – өзін-өзі ұсынғандар. 80 пайызы – ер адам, 20 пайызы - әйел. Кандидаттардың орташа жасы – 49-50.
ОСК өкілінің сөзіне қарағанда, 45 кандидат өтінішін өз еркімен қайтарған. 125 кандидат тіркеуден өте алмаған: 114-і "тіркеу құжатын толық бермеген". Тағы бір адамның "заңмен көрсетілмеген уақытта үгіт-насихат жүргізгені үшін" тіркеу өтініші мақұлданбаған.
Бұған дейін ОСК түрлі деңгейдегі мәслихаттарға барлығы 12 мыңға жуық кандидат ұсынылғанын хабарлаған еді. 19 ақпанда ОСК олардың 10,2 мыңнан астамы тіркелгенін айтты: 61,8 пайызы – өзін-өзі ұсынғандар, 38,2 пайызын саяси партиялар мен қоғамдық ұйымдар ұсынған. Олар 3081 орынға "таласады". Бүкіл елде 223 мәслихат бар.
Бір күн бұрын Алматы қаласы аумақтық сайлау округы азаматтық белсенді Әйгерім Тілеужанды мәжіліс депутаттығынан үміткер ретінде тіркеуден бас тартқан еді. Сайлау комиссиясы үміткердің "сайлау жарнасының" дұрыстығына күмән келтірген. Ал жақтастары комиссияның қоғамдық-саяси мәселелерге пікірін ашық айтқан, билікті сынап жүрген белсендіні тіркемес үшін "сынықтан сылтау" іздегенін айтқан. Ал комиссия өкілдері мұны жоққа шығарған.
Қазақстанда бұған дейін де кей азаматтық белсенділер мәжіліс және мәслихат депутаттығынан үміткер ретінде тіркеле алмаған.
Қазақстанда кезектен тыс мәжіліс және мәслихат сайлауы 19 наурызда өтеді. Азаматтар партия атынан я жеке кандидат ретінде сайлауға түсе алады. Бір күн бұрын елде кандидаттарды тіркеу аяқталып, үгіт-насихат кезеңі басталған.
Парламент сайлауы қарсаңында Астана аралас мажоритар-пропорционал жүйе енгізілгенін алға тартып, сайлау "бәсеке жағдайында өтеді" деп мәлімдеді. Сыншылар саяси режим өзгермегенін, билік саяси күштер арасында шынайы бәсекеге жол бермей отырғанын айтады. Олардың пікірінше, бірмандатты округтерде оппозиция кандидаттары тіркелсе де, сайлауды бақылау мен дауыс санау бәрібір Ақорданың қолында.
Орталық сайлау комиссиясы (ОСК) мәліметінше, мәжіліс сайлауына партиялық тізім бойынша жеті саяси партия атынан 281 кандидат тіркелген.