ҚазТАГ басшысы Әсет Матаев үйқамаққа ауыстырылды
ҚазТАГ ақпарат агенттігінің бас директоры Әсет Матаев үйқамаққа ауыстырылды. Бұл туралы 30 наурызда адвокат Елена Жигаленокқа сілтеп, ҚазТАГ хабарлады. Адвокаттың айтуынша, шешім апелляция негізінде қабылдаған.
Наурыздың соңында Әсет Матаев Алматыдағы төбелестен кейін "Бұзақылық" бабымен күдікке ілініп, екі айға қамауға алынған. Полицияның айтуынша, Алматыдағы төбелестен соң "Бұзақылық" бабы бойынша іс қозғалып, төбелеске қатысушылар оның ішінде, Матаев та ұсталған. Адвокаты Рена Керимова бұған дейін оның басы жарылғанын, өзін нашар сезінетінін айтқан еді.
2025 жылы желтоқсанда басында ҚазТАГ басшысы Әсет Матаев пен ҚазТАГ агенттігінің бас редакторы Әмір Қасенов "көрінеу жалған ақпарат таратты" деген күдікке ілінген. Содан бері Қасенов үйқамақта отыр, қылмыстық іс бойынша тергеу жүріп жатыр. 2026 жылы қаңтарда прокуратура Матаевты да үйқамаққа алу туралы өтініш беріп, кейін оны қайтарып алған. Матаевқа қарсы "Көрінеу жалған ақпарат тарату" бабы (274-бап) бойынша қылмыстық іс тоқтатылған еді.
ҚазТАГ бұл істі өздеріне жасалған қысым деп санайды.
Агенттіктің үстінен Freedom Finance компаниясы арыз түсірген. ҚазТАГ бұған дейін Freedom Finance компаниясындағы "алаяқтық схемалардан зардап шеккендер" жайлы деп бірнеше мақала мен видео жариялаған. Ал Freedom Finance жарияланған мақала мен видеолар шындыққа жанаспайды дейді. ҚазТАГ басшылығы бұл қылмыстық істі сөз бостандығын шектеу әрекеті деген.