Кыргызстанга өткөн жылы алты миллион турист келди
2022-жылы Кыргызстанга чет өлкөдөн 6 миллион турист эс алуучу келип, туризм тармагынан казынага 951 млн. сом салык түшкөн. Бул тууралуу Туризм департаментинин жетекчиси Самат Шатманов парламенттеги "Ишеним" фракциясынын жыйынында билдирди.
Өткөн жылы 17-мартта кыргыз өкмөтү "Туризмди өнүктүрүүнү колдоо фонду" ачык акционердик коомун түзүп, уставдык капиталын 1 млрд. сом деп белгилеген. Фонд ички туризмди өнүктүрүүгө багытталган демилгелерди ишке ашыруу менен алектенет. Кыргызстанда ички дүң өндүрүшүндө туризмдин үлүшү 3,1 пайызды түзөт.
Кыргызстанда учурда 67 өлкөнүн жарандарына визасыз режим иштейт. Чек ара кызматынын маалыматына таянсак, турист катары келгендердин эң көбү Казакстан, Өзбекстан, Орусия, Европа жана Араб өлкөлөрүнүн жарандары. (TSh)