Азербайжанда эки армян аскери 11,5 жылга эркинен ажыратылды
7-июлда Сумгаит шаарындагы сот аларды "Азербайжанда теракт уюштурууга даярданган, диверсия кылууга аракеттенген" деген айыптар боюнча күнөөлүү деп тапты. Армян тараптын билдирүүсүнө караганда, чек арадагы жоокерлерге суу жана азык-түлүк ташып бараткан аскерлерди май айында азербайжандык диверсанттар уурдап кетишкен.
Буга чейин Арменияда эки азербайжандык аскер кесилген. Гусейн Ахундов Капан айылынын тургунунун өлүмүнө айыпталып 20 жылга эркинен ажыраса, Агшин Бабиров чек арадан курал-жабдык менен мыйзамсыз өткөн деген айып менен 11,5 жылга кесилген.
Азербайжан менен Армения Тоолуу Карабактын айынан ондогон жылдардан бери урушуп келишет.
2020-жылдагы алты аптага созулган согушта Армения 4 миңдей, ал эми Азербайжан 3 миңдей жаранын жоготкону кабарланган.
Жаңжалда Азербайжан Тоолуу Карабактагы мурда Армения көзөмөлдөп турган бир нече районду жана Шуша шаарын кайтарып алган. Москванын арачылыгы менен жетишилген келишимге ылайык, аймакка Орусиянын тынчтык орнотуучу контингенти жайгаштырылган.
Андан бери эки тараптын чек арадагы атышуулары утур-утур кайталанып, бул үчүн Баку менен Ереван бири-бирин айыптап келет.