Тажикстанда электр энергиясынын импорту азайды
Тажикстанда электр энергиясын экспорттоо былтыркыга салыштырмалуу азайды. Бул тууралуу президентке караштуу Статистика агенттиги билдирди.
2023-жылдын алты айында электр энергиясын экспорттоодон түшкөн жалпы сумма 43,2 миллион долларды түздү. Бул былтыркы ушул мезгилден 1,4 миллион долларга аз экенин "Озоди" радиосу кабарлады. Экспорттун азайышынын чоо-жайы так эмес.
Тажикстан түзүлгөн келишимдерге ылайык, Ооганстанга жыл бою, ал эми Өзбекстанга жазында жана жайында электр энергиясын берип турат.
Тажикстанда электр энергиясын чет өлкөгө экспорттоо ар дайым талаштуу маселелердин бири. Айрым жарандар биринчи кезекте элге жылуулук, жарык берүү керектигин белгилешет. Бийлик сыртка ашыкча электр энергиясы гана сатылып жатканын айтат.
Маалымат каражаттары ушул күндөрү Тажикстандын аймактарында жарык тез-тез өчүрүлүп жатканын жазышууда.