Ок-дары өндүргөн Бишкек штамптоочу заводуна 470 млн сом насыя берилет
Жогорку Кеңештеги Бюджет, экономика жана фискалдык саясат комитети 11-сентябрдагы жыйынында "Бишкек штамптоочу заводуна" 476 миллиондон ашык сом насыя берүүнү колдоду.
Финансы министринин орун басары Руслан Татиков өкмөттүн буга байланыштуу тескемесинин долбоору менен тааныштырып жатып, насыяны он жылга берүү каралып жатканын билдирди.
"Бул завод стратегиялык объект болуп саналат. Анын иши аскердик багыттагы продукцияларды өндүрүү жана сатуу болуп эсептелет. Бюджеттик насыя төмөнкү шарттарда берилет: мамлекеттик ишкананы оңдоо, калыбына келтирүү жана карыздарын жабуу. Насыя акча которулган убактан тартып он жылга берилет. Анын ичинде негизги сумманы жана пайыздарды төлөөгө жеңилдетилген мезгил үч жыл болот. Насыянын пайыздык чени 3% деп чектелди",-деди Татиков.
Ушул жылдын май айында президент Садыр Жапаров менен Министрлер кабинетинин төрагасы Акылбек Жапаров аталган заводдун абалы менен таанышкан.
Мурдагы Ленин заводунун базасындагы бул ишкана өлкөдөгү стратегиялык ишканалардын бири. Анда ок-дарылар өндүрүлөт. Завод Мамлекеттик мүлк фондуна карайт жана ишканада учурда 500дөн ашык адам эмгектенет.
Бишкек штамптоочу заводу 2021-жылы 80 жылдыгын белгилеген.