Ливияда сел курмандыктары 20 миңге жетиши мүмкүн
Ливияда селде курман болгондордун саны 18-20 миңге жетиши мүмкүндүгүн Дерна шаарынын мэри Абдулменам ал Гайти билдирди. Калаа башчысы мындай божомолду сел жууп кеткен жерлердин масштабына салыштырып айтканын Reuters агенттиги 14-сентябрда жазды.
Ал эми AP агенттиги Ливия өкмөтүнө таянуу менен 5500 адамдын өлүмүн тастыкталганын, дагы 9000 чамалуу киши дайынсыз экенин билдирди.
7-сентябрда башталган нөшөр, ага кошумча 10-сентябрган караган түнү Жер Ортолук деңизи тараптан каптаган "Дэниел" бороонунан Ливиянын чыгышы өзгөчө жабыркады. Күбөлөрдүн белгилешинче, суунун агымы эки дамбаны бузуп кеткен. Табият кырсыгы 125 миң калкы бар Дерна шаарынын төрттөн бир бөлүгүн жарактан чыгарды.
Египет, Алжир жана Палестина Ливияга куткаруучулар менен дарыгерлерди жөнөттү.