“Бир дүйнө Кыргызстан 2023” фестивалында быйыл 25 тасма көрсөтүлөт
Адам укуктары боюнча даректүү тасмалардын “Бир дүйнө Кыргызстан 2023” эл аралык XVII фестивалы бул жолу 27-ноябрда башталып, 1-декабрда жыйынтыкталат. Бул тууралуу 20-сентябрда “Бир дүйнө Кыргызстан” укук коргоо кыймылынан билдиришти.
Бул ирет фестиваль “Бардык адамдар үчүн кадыр-барк, эркиндик жана адилеттүүлүк!” деген ураан менен уюштурулууда.
“Фестиваль “Искусство аркылуу адам укугу” – “Human Rights trough Art” жаңычыл форматы аркылуу жергиликтүү жана эл аралык эксперттердин, документалисттердин катышуусунда адам укуктары жаатындагы даректүү чындыктарды талкуулоо үчүн кенен аянтча түзүп берет. БУУнун Укук коргоочуларды коргоо боюнча декларациясынын 25 жылдыгына жана БУУнун Адам укуктары боюнча декларациясынын 75 жылдыгына карата аталган фестиваль адам укугунун универсалдуулугу жана бөлүнбөстүгү боюнча билимди тереңдетүүгө, ошондой эле адам эркиндигин жана укугун коргоо мүмкүнчүлүктөрүн кеңейтүүгө, гендердик теңчиликке, инклюзивдүүлүккө, басмырлоого жол бербөөгө багытталган эл аралык өнөктүккө кошулат”, - деп билдирди “Бир дүйнө Кыргызстан”.
Фестивалдын конкурстук программасында эркиндикти, адамдын кадыр-баркын, адилеттүүлүктү жана чечим кабыл алууда жарандардын бирдей катышуусун жактаган даректүү тасмалар катышып келет. Быйылкы конкурстук программада адам укуктары боюнча жалпысынан 25 даректүү тасма бар, анын 11и чет өлкөлүк жана 14ү кыргызстандыктар тарткан тасмалар. Фестивалдын тасмаларын көрүү жана чыгармачыл жамаат менен жолугушуулар акысыз. (RK)