Коюу тумандан улам Ош-Бишкек аба каттамдары кармалып турат
8-декабрда өлкө аймагындагы коюу туманга байланыштуу Бишкек жана Ош аэропортторунда ички каттамдагы учактар учпай турат. Мындай маалыматты “Манас” аэропорту “Азаттыкка” ырастап, учурда Ош шаарында Бишкекке учуп келе турган алты каттам кармалып жатканын билдирди. Бул каттамдар качан жанданары белгисиз.
Ал эми Бишкектен чет өлкөгө каттамдар өз убагында аткарылып жатат.
Аба ырайы кескин өзгөрүп, туман каптаган маалда Кыргызстандагы аэропорттордо каттамдар кармалган учурлар катталып келет.
Кыргызгидромет борбору шашылыш билдирүү таратып, 8-декабрдан тарта Кыргызстандын аймагында аба ырайы кескин өзгөрөрүн, айрым аймактарда кар жаай турганын эскерткен.