Коомдук укук коргоочулардын Кыргызстанга кереги барбы? «Ачык саясат», 17.06.11
Аскер САКЫБАЕВА,
«Жаңы Агым» гезитинин баш редактору:
— Албетте, коомдук укук коргоочулардын Кыргызстан үчүн кереги бар. Бул өтө маанилүү. Биринчи кезекте адам укуктарын жөнгө салыш керек. Укуктук жактан Кыргызстандын жарандары бир топ эле жабыр тартып келет. Акыркы учурларда бейөкмөт уюмдардын адамдарды тең укуктуулукка чакырып жатышы жакшы көрүнүш деп эсептеймин. Бирок, айрым учурларда бир аз жаңылыштык кетирип койгону болбосо эле, аялдардын, балдардын укуктарын коргоодо жылыштар бар.
Эрнист БАЛБАКОВ,
«Фабула» гезитинин баш редактору:
— Негизи бейөкмөт уюмдардын Кыргызстанга кажети деле жок. Биздин менталитетке да туура келбеген аракеттерди жасашат. Демократиялуу коомдо «элдин укугун коргойбуз» -деп коюп тескери иштерге барышат. Ал турган иш. Коомдук уюмдар адам укуктарына толук деңгээлде басым жасаса жакшы болмок эле. Теңирден тескери кетишип Американын саясатына карап багыт алып жатышпайбы. Ошондуктан бейөкмөт уюмдар, Кыргызстан үчүн анчейин деле зарыл эмес.
Азамат КЫЯЗОВ,
«Кереге» гезитинин
директору:
— Менин оюмча бейөкмөт уюмдарынын кереги жок. Анткени, акыркы учурларда чагымчыл топ катары элес калтырып жатат. Коомдук укук коргоочу уюмдардын негизги милдети элдин укугун бейтарап караш керек да. Тескерисинче, булар улуттун ортосундагы мамилени бузуп бир тараптуу басым жасап жатышат. Элди бири-бири менен тирештирип чагымчылдык кылып, батыштын саясатына ылайыктап жатат. Адам укуктарын тең салмакта карайт деп да айтуу кыйын. Кайсыл бир тараптын мүдөөсүн ишке ашырыш керек да. Кечегиде Азимбек Бекназаров айтпадыбы «үчүнчү күчтөр бар» деп, чындыгында ошондой да болушу мүмкүн, үчүнчү күч дегенине караганда.
Назгүл БОСТОНБАЕВА,
«Ош шамы» гезитинин
редакторунун орун басары:
— Бейөкмөт уюмдар эч кандай маанилүү иш аткара албайт. Кыргызстанда менталитет башка. Ал эми батыш мамлекеттеринде элдин менталитети, жүрүм-турумдары таптакыр башка. Шайкеш келе бербейт. Кыргызстандагы адам укуктарын тескери тарапка оодуруп, кандайдыр бир терс сапаттарын сиңирип кетиши мүмкүн. Ааламдашуу процессинде мындай нерселерден кооптонуу туулуп жатат. «Адам укуктарын коргойбуз, тең салмактуулукту сактайбыз, демократиянын чордонунда жашайбыз» -деп койгону менен, жасаган иштери тескери. Ош окуясын деле Эл аралык комиссия иликтөөгө алып, бирок, бир тараптуу жыйынтык чыгарып берип койбодубу кыргыздарды мыкаачы улут катары көрсөтүп. Ошондуктан, бейөкмөт уюмдарды Кыргызстанга киргизүүнүн кажети жок.
Машакбай РАХМАНКУЛОВ,
«Айкын саясат» гезитинин саясий баяндамачысы:
— Жеке көз карашымда, бейөкмөт укук коргоочу уюмдар Кыргызстанга керек. Анткени, алар Кыргызстандын бюджетинен каржыланбайт, тигил же бул жактын атын камчылагандан алысыраак деп ойлойм. Тең салмактуулукту сактайт деген ойдомун. Бирок, булардын бир кемчилиги бар. Кыргызстанды дүйнөлүк масштабда карап, ошол элдердин менталитетине салыштырышат. Албетте, бул жагынан алганда шайкеш келбет.
Даярдаган
Жамалидин
ПАРМАНКУЛОВ
The post Коомдук укук коргоочулардын Кыргызстанга кереги барбы? «Ачык саясат», 17.06.11 first appeared on Кыргыз гезиттер архиви.