Minst 23 drepne i sjølvmordsangrep i Nigeria
Minst 23 menneske er drepne og over 100 såra etter fleire eksplosjonar i byen Maiduguri nordaust i Nigeria, opplyser politiet. Det melder nyheitsbyrået AFP.
Førebelse undersøkingar tyder på at angrepa blei utførte av sjølvmordsbombarar, seier polititalsmann Nahum Kenneth Daso.
Eksplosjonane skjedde måndag kveld, kort tid etter eit angrep mot ein militærpost i same område.
Maiduguri ligg i delstaten Borno som er eit kjerneområde i konflikten mellom nigerianske styresmakter og islamistiske opprørsgrupper som Boko Haram og ISWAP.
Konflikten har sidan 2009 kravd titusenvis av liv og drive over 3,3 millionar på flukt.