لوبغاړي: په پکتیا کې د کرکټ معیاري لوبغالی او اکاډمي نه لرو
دوی د افغانستان د کرکټ بورډ چارواکي له دې ولایت سره په توپیري چلند تورن کړل او زیاتوي له پکتیا والو سره ژمنه شوې وه چې دې ولایت کې به د زون په کچه په نړیوال معیار برابر لوبغالی جوړیږي، خو په ټکو یې تراوسه ورته په یوه هوار میدان له کرل شوي چمن پرته نور هېڅ هم نه دي جوړ شوي.
۱۹ کلن عبدالعزیز وفا له تېرې یوې لسیزې راهیسې پکتیا کې د کرکټ لوبه کوي وایي، غواړي په لوړه کچه کرکټ لوبو ته ځان ورسوي، خو د معیاري لوبغالي او د تمرین ځای د نشتوالي له امله یې تر اوسه دا هیله نه ده پوره شوې.
وفا زیاته کړه: "تر اوسه اکاډمي نه لرو، یوازې زه نه بلکې ټول لوبغاړي همداسې هیله لري، خو کرکټ بورډ ورته پام نه دی کړی."
په پکتیا کې د کرکټ پر لوبې تبصره کوونکی او پخوانی لوبغاړی حقمل مسعودزی وایي، پکتیاوالو لوبغاړو د کرکټ میدان دغې پروژې ته د یوې نړیوالې پروژې په سترګه کتل، خو خبر نه و چې کرکټ بورډ ورته د یوې ولسوالۍ په کچه تش چمن رغولی.
دی وایي، د دې میدان لپاره ځانګړې شوې بودجه هم په مکمل ډول نه ده لګول شوې: "لوبغالي کې یې غیر معیاري چمن کرلی نور هېڅ نه دي شوي، په پیل کې دغه لوبغالي لپاره ۷ سوه پنځوس زره امريکایي ډالر ځانګړي شوي وو، خو په ۲۰۱۵ کال کې د چارو پیل پر مهال کرکټ بورډ یې ۲ سوه او ۳۳ زره ډالره لګښت اعلان کړ."
د کرکټ لوبغاړي، څارونکي او مینه وال له کرکټ بورډه غواړي چې نه یوازې دوی ته معیاري اکاډمي او په نړیوال معیار برابر لوبغالی ورغوي، بلکې دې پروژه کې شوی فساد هم وڅېړي.
ازادي راډیو د خلکو او لوبغاړو دغه شکایتونه د افغانستان د کرکټ بورډ له ویاند فرید هوتک سره شریکول غوښتل خو له تېرو شپږو ورځو راهیسې ښاغلي هوتک اړیکه ځواب نه کړه.
په پکتیا کې د کرکټ ولایتي استازي بخت زرملوال رسنیو ته وویل چې د خلکو او لوبغاړو دغه غوښتنې او ستونزې یې په ځلونو له مسؤلینو سره شریکې کړي، خو تر اوسه یې مثبت ځواب نه دی ترلاسه کړی.
دی وايي: "دوی په خپل پلان کې هم لري، د انجنيري يو ټيم یې هم رالېږلی وو، کوم ضرورتونه چې د ترميم په اړه وو هغه يې له ځان سره وړي او موږ ته يې ډاډ راکړی."
د یادونې وړ ده چې څو ورځې وړاندې د پکتیا ولایتي شورا، مدني فعالانو او د کرکټ لوبغاړو په پکتیا کې د کرکټ بورډ سیمه ییز دفترهم له دې امله وتاړه چې له دوی سره توپیري چلند کېږي او غوښتنې یې نه اورېدل کېږي.