ZRRE-ja e ul çmimin për ngrohje në Prishtinë dhe Gjakovë
Zyra e Rregullatorit për Energji (ZRRE) e Kosovës ka vendosur ta ulë çmimin e ngrohjes nga ndërmarrjet publike për konsumatorët në Prishtinë dhe Gjakovë.
Rregullatori i energjisë bëri të ditur për Radion Evropa e Lirë se e ka ulur për 3.8 për qind çmimin e ngrohjes me matje për konsumatorët e Termokosit në kryeqytet, ndërsa për 5 për qind për ata të Ngrohjes së Qytetit në Gjakovë.
ZRRE-ja e miratoi vendimin për këtë ulje gjatë një mbledhjeje të martën.
Çmimi i deritanishëm për ngrohjen me matje ishte 76 centë për kilovat në muaj, i vendosur vitin e kaluar.
Me çmimin e ri, tani konsumatorët në Prishtinë do të paguajnë 73 centë për kilovat në muaj, ndërsa ata në Gjakovë 72 centë.
Termokos ka rreth 25.000 konsumatorë në kryeqytetin me 227.154 banorë.
Sezoni i ngrohjes nga Termokos-i zakonisht nis më 15 tetor dhe vazhdon deri më 15 prill.
Vitin e kaluar, qytetarë të Prishtinës kishin shprehur pakënaqësi me çmimin e ngrohjes, duke e ankuar për faturat e tyre mujore.
Kjo ndodhi pas ndryshimit të mënyrës së faturimit atë vit nga ndërmarrja publike Termokos. Disa nga ankuesit dyshonin se matja e konsumit nuk ishte bërë siç duhet.
Termokos përcaktonte faturimin bazuar në sipërfaqen e hapësirave të banesave apo shtëpive, me një çmim prej 76 centësh për metër katror.
Por, nga viti i kaluar, ajo filloi ta bëjë faturimin bazuar në matës të shkallës së shfrytëzimit të ngrohjes.
Vendimi për uljen e çmimit të ngrohjes vjen në një kohë kur një pjesë e madhe e qytetarëve ngrohen me rrymë, gjë që ka shkaktuar mbingarkesë të madhe në rrjetin energjetik të vendit.
Kompania Kosovare për Shpërndarjen e Energjisë (KEDS) u ka bërë thirrje vazhdimisht qytetarëve për përdorim “të përgjegjshëm” të rrymës, duke u ankuar në mbingarkesë.
Ndërkohë, qytetarët dhe bizneset janë ankuar për ndërprerje të rrymës këtë muaj.
Në ditët e fundit, ndërprerje ka pasur nëpër shumë qytete, si në Rahovec, Prizren, Lipjan, Gjilani, Suharekë, Viti e Prizren.
Kosova arrin ta prodhojë 94 për qind të energjisë – apo rreth 800 megavat në orë – përmes djegies së thëngjillit, ndërsa sasinë tjetër e siguron nga burimet e ripërtërishme: hidrocentralet, panelet diellore dhe turbinat e erës.
Por, në kohë ngarkesash të mëdha si fundvitit, ajo detyrohet të importojë rrymë në vlerë miliona kryesisht nga vendet fqinje.
Në fillim të këtij viti, ZRRE e rriti çmimin e rrymës dhe tani konsumatorët që shpenzojnë deri në 800 kilovatë brenda një muaji do të paguajnë 9.05 centë për kilovat. Ndërsa për ata që shpenzojnë më shumë se 800 kilovatë, kilovati do të kushtojë 15.43 centë.
Gjatë periudhës nga 1 prilli deri më 30 shtator nga ora 23:00 deri në 08:00 të mëngjesit, çmimi për kilovat është 3.88 për ata që shpenzojnë deri në 800 kilovatë. Ndërkaq, ata që shpenzojnë më shumë se 800 kilovatë do të paguajnë 7.28 centë për kilovat.