Сафари президенти Эрон ба Покистон
Масъуд Пизишкиён, раисҷумҳури Эрон 2 август бо сафари дурӯзаи давлатӣ ба Покистон сафар кард.
Дар ин сафар Масъуд Пизишкиёнро як ҳайати баландпоя, ба шумули вазири корҳои хориҷӣ Аббос Ароқчӣ ва дигар мақомҳои аршади он кишвар ҳамроҳӣ мекунанд.
Интизор меравад, ки дар ин сафар Масъуд Пизишкиён бо раҳбарони сиёсӣ ва низомии Покистон, аз ҷумла, президент Осиф Алӣ Зардорӣ, нахуствазир Шаҳбоз Шариф ва фармондеҳи артиш Осим Мунир, мулоқотҳои ҷиддӣ анҷом диҳад.
Ба иттилои Радиои Покистон, ин сафар бо даъвати нахуствазири он кишвар Шаҳбоз Шариф сурат мегирад.
Ин нахустин сафари Пизишкиён ба Покистон дар мақоми президенти Эрон аст. Қаблан, 26 майи соли ҷорӣ сарвазири Покистон Шаҳбоз Шариф ба Эрон сафар карда буд.
Расонаҳои Эрон навиштанд, Пизишкиён ҳангоми тарки Теҳрон гуфт, ки Исломобод дар ҷанги 12-рӯза, ҳамлаи Исроилро маҳкум намуд ва аз Эрон ҳимоят кард.
Президенти Эрон бо қадрдонӣ аз ин ҳимоят гуфтааст, Теҳрон ва Исломобод талош мекунанд мубодилаи тиҷорӣ бо якдигарро ба 10 миллиард доллар боло баранд.