Мансабдори гумонзад ба ришвагирӣ бо ҷарима озод шудааст
Додгоҳе дар вилояти Суғд як мансабдорро, ки ба гирифтани 100 ҳазор сомонӣ "пора" дастгир шуда буд, бо пардохти ҷарима озод кардааст.
Намояндагони Оҷонси мубориза бо коррупсия дар вилояти Суғд аввали моҳи август дар нишасти хабарӣ гуфтанд, Эгам Ҳайдарзода барои додани қитъаи замин ба як шаҳрванд аз ӯ 100 ҳазор сомонӣ ришва гирифтааст. Мақомот гуфтанд, раиси ҷамоат ба воситаи як зердасташ ин корро кардааст.
Назари Ҳайдарзода ба иттиҳом маълум нест.
Намояндагони Оҷонси мубориза бо коррупсия гуфта буданд, ба зидди Эгам Ҳайдарзода барои "гирифтани пора дар ҳаҷми махсусан калон" (қисми чори моддаи 319-и Кодекси ҷиноӣ) парванда боз кардаанд.
Кодекси ҷиноӣ барои ин иттиҳом аз 7 то 12 сол зиндон пешбинӣ кардааст.
Ба гузориши хабаргузории "Азия-Плюс", Додгоҳи шаҳри Конибодом Эгам Ҳайдарзодаро танҳо ҷарима бастааст.
Манбаъ мегӯяд, Эгам Ҳайдарзода дар ҳоли ҳозир дар Русия аст. Вай 12 соли охир раиси ҷамоати "Ориёно"-и ноҳияи Ашт будааст.
Фасод, яъне гирифтани "пора" ва дуздии пулҳои давлат аз мушкилиҳои асосии Тоҷикистон гуфта мешавад. Сокинон борҳо шикоят кардаанд, ки бе додани ришва корашон дар идораҳои давлатӣ саривақт анҷом намешавад.