Ҳукумат муҳлати иҷрои қонуни суғуртаро 5 соли дигар ба қафо андохт
Ҳукумати Тоҷикистон бо мувофиқаи порлумон муҳлати иҷрои қонун "Дар бораи суғуртаи тиббӣ"-ро барои панҷ соли дигар, яъне то соли 2030 ба таъхир гузошт. Мақомот мегӯянд, сарчашмаи маблағгузории ин қонун то ҳол аниқ нест.
Дар қонун пешбинӣ шудааст, ки маблағи суғуртаи тиббӣ аз ҳисоби буҷаи кишвар бояд пардохт шавад. Вале дар хулосаи расмӣ омадааст, агар маблағи суғуртаи тиббӣ аз ҳисоби андози иҷтимоӣ пардохт шавад, пас давлат дар иҷрои ӯҳдадориҳои иҷтимоии худ, яъне пардохти кумакпулӣ ва нафақа, ба мушкил дучор мешавад.
Аз сӯи дигар, Вазорати меҳнат ва муҳоҷират пешниҳоди пардохти маблағи суғуртаи тиббӣ аз ҳисоби маоши коргаронро низ қабул накардааст.
Намояндагони ин вазорат гуфтаанд, маоши коргарон дар Тоҷикистон бе ин ҳам басанда нест ва гирифтани чанд дарсад маош барои суғурта, сатҳи зиндагии мардумро мушкил мекунад.
Қонун дар бораи суғуртаи тиббӣ дар Тоҷикистон соли 2008 қабул шуда, вале то ҳол иҷро нашудааст. Мақомот маротибаи шашум аст, ки иҷро шудани ин қонунро ба таъхир мегузоранд.
Коршиносони бахши тиб борҳо гуфтаанд, ҷорӣ шудани суғуртаи тиббӣ дар Тоҷикистон, фасодро дар соҳаи тандурустӣ кам мекунад. Ин таҷриба дар бисёр кишварҳои пешрафта ва ҳамсояҳои Тоҷикистон амал мекунад.