Ба хонаводаи афсари кушташуда дар Хоруғ хона доданд
Мақомот дар Вилояти Мухтори Кӯҳистони Бадахшон эълон карданд, ки ба хонаводаи Зиреҳбон Наврӯзбеков, як афсари Нерӯҳои марзбонии Кумитаи давлатии амнияти миллии Тоҷикистон, ки ҳафтаи гузашта дар даргирӣ бо афроди мусаллаҳ дар марз бо Афғонистон кушта шуд, хона тақдим кардаанд.
Тибқи хабаре, ки дар сафҳаи фейсбуки мақомоти иҷроияи Вилояти Мухтори Кӯҳистони Бадахшон нашр шуд, ба хонаводаи ин афсари кушташуда дар шаҳри Хоруғ хонаи дуҳуҷрагӣ дода шудааст. Дар хабар омадааст, ки мақомот дар оянда ба хонаводаи афсари кушташуда кӯмак хоҳанд кард.
Зиреҳбон Наврӯзбеков ва Исматулло Қурбонов, ду афсари Нерӯҳои марзбонии Кумитаи давлатии амниятӣ миллӣ рӯзи 24 декабр дар даргирӣ бо афроди мусаллаҳ дар наздикии мавзеи Қавоқ дар ноҳияи Шамсиддин кушта шудаанд. Мақомоти тоҷик ҳамлаваронро "гурӯҳи террористӣ" ном бурданд.
Бар пояи иттилои манбаъҳои Радиои Озодӣ, Зиреҳбон Наврӯзбекови 33-сола бо зарби шаш тир ба ҳалокат расидааст. Ӯ зодаи ноҳияи Шуғнони Вилояти Мухтори Кӯҳистони Бадахшон аст ва пайкарашро баъди ташхису шиносоӣ ба зодгоҳаш фиристоданд.
Исматулло Қурбонови 28-сола дар ин ҳодиса ба ҷуқурии 200-метрии яке аз ғорҳои минтақа афтода буд ва як рӯз баъд ҷасади ӯро берун оварданд ва дар зодгоҳаш ноҳияи Ҳамадонии вилояти Хатлон ба хок супурданд.
Ҳардуи ин афсарон дар қисми марзбонии "Саричашма" адои хидмат мекарданд.