Узбекистон ва Тоҷикистон масири нави боркашонӣ боз мекунанд
Тоҷикистон ва Узбекистон интиқоли молу коло аз тариқи долон ё масири навро ба таври озмоишӣ ба роҳ мемонанд.
Вазорати нақлиёти Тоҷикистон дар хабарномае гуфт, долони нав "Чин – Тоҷикистон – Узбекистон – Туркманистон – Эрон –Туркия-Аврупо"-ро дарбар мегирад.
Қарор аст, ки дар навбати аввал корвони иборат аз 10 мошини пурбор аз Узбекистон тавассути қаламрави Тоҷикистон ҷониби Чин роҳсипор шаванд.
Бар асоси созише, ки миёни вазирони нақлиёти Тоҷикистон ва Узбекистон ҳосил шудааст, рухсатномаҳо барои интиқоли бор дар шакли электронӣ дода мешаванд.
Корвони аввали мошинҳо ба таври озмоишӣ дар масири нав ҳаракат мекунад ва маълум нест, ки ҳаракати доимии мошинҳои боркаш дар ин масир аз кай оғоз мешавад.