Номи ҷавони тоҷикеро эълон карданд, ки ҳамсари собиқашро куштааст
Мақомоти интизомии Тоҷикистон номи мардеро эълон карданд, ки ба қатли бераҳмонаи ҳамсари собиқ ва модари ду фарзанди худ муттаҳам мешавад.
Вазорати корҳои дохилии Тоҷикистон дар як барномаи телевизионии худ хабар дод, ки Наврӯзи Зафар ба он муттаҳам мешавад, ки дар заминаи хусумат ва рашк ҳамсари собиқи 27-солаи худро дар хонаи худи зан ва дар пеши чашми модараш 11 корд зада куштааст. Ба гуфтаи вазорат, ҳодиса рӯзи 16-уми декабр рух додааст.
Дар ин барномаи телевизионӣ гуфта мешавад: “Наврӯзи Зафар ҳамсари собиқи худро дашномҳои қабеҳ дода ва бо ин қонеъ нашуда бо бераҳмии махсус ба узвҳои ҳаётии зан 11 корд мезанад, ки ӯ дар натиҷа дар ҷойи ҳодиса ҷон додааст.” Назари худи муттаҳам ба ҷиноят ва ё вакили дифои ӯ ҳанӯз маълум нест. Ин ҷуфт як ҳафта пеш аз ҳодиса аз ҳам ҷудо шудаанд.
Ба қавли мақомот, Наврӯзи Зафар пас аз қатли ҳамсари собиқаш аз ҷойи ҷиноят фирор кардааст, вале ӯро баъди чанде дар қаламрави ноҳия дастгир кардаанд. Додситонии ноҳияи Мӯъминобод ба таҳқиқи парвандаи ин сокини 29-солаи деҳаи Ғеш идома медиҳад. Барои одамкушӣ бо бераҳмии хос дар Тоҷикистон на камтар аз 15 соли зиндон таъйин карда шудааст.
Дар Тоҷикистон омори алоҳидае дар бораи занкушӣ нест. Ҷустуҷӯи кӯтоҳи Радиои Озодӣ фақат дар вебсайти Вазорати корҳои дохилӣ нишон дод, ки соли 2024 ва дар даҳ моҳи соли 2025 зиёда аз даҳ мавриди занкушӣ сабт шудааст. Ин танҳо мавридҳоест, ки вазорат дар бораи онҳо расман хабар дода, парвандаи ҷиноӣ боз кардааст. Дар баёнияҳо гуфта шудааст, ки занони тоҷикро ё шавҳаронашон, ё мардони хешованд ва ё ҳамсарони собиқашон куштаанд.