"Фавран Эронро тарк кунед". Ҳушдори Чин ва чанд кишвари аврупоӣ
Дар пайи зиёд шудани эҳтимоли даргирӣ миёни Амрико ва Эрон, чанд кишвари аврупоӣ ва Чин аз шаҳрвандонашон хостанд, ки фавран Эронро тарк кунанд.
Аз ҷумла Вазорати корҳои хориҷии Итолиё 27-уми феврал дар баёнияе аз шаҳрвандони ин кишвар хост, аз Эрон бароянд ва аз сафар ба Ироқ ва Лубнон худдорӣ кунанд.
Вазорати корҳои хориҷии Лаҳистон ҳам рӯзи ҷумъа аз шаҳрвандони ин кишвар хост, ки бо далели вазъияти пуртаниш дар Ховари Миёна, фавран Эрон, Исроил ва Лубнонро тарк кунанд.
"Вазъияти амниятӣ дар Ховари Миёна нопойдор аст. Хатари бадтар шудани вазъият зиёд аст. Мумкин аст ҳарими ҳавоӣ барои парвозҳои мулкӣ баста шавад", -ҳушдор додааст Вазорати корҳои хориҷии Лаҳистон.
Фаронса ҳам ба шаҳрвандонаш тавсия кардааст, ки аз сафар ба Исроил, Байтулмуқаддас ва Каронаи Бохтарӣ худдорӣ кунанд.
Ҳукумати Бритониё рӯзи 27-уми феврал эълом кард, ки ба далели вазъияти амниятӣ кормандони сафорати худро ба таври муваққатӣ аз Эрон хориҷ кардааст.
Хабаргузории давлатии Чин низ эълом кард, ки ин кишвар ба шаҳрвандонаш тавсия кардааст, ки аз сафар ба Эрон худдорӣ кунанд ва касоне, ки дар Эрон ҳастанд "ҳарчӣ зудтар" хоки он кишварро тарк кунанд.
Шоми 27-уми феврал ҳамчунин парвозҳо аз шаҳри Истанбули Туркия ба Эрон лағв шуд.
Дар ҳамин ҳол Доналд Трамп, раиси ҷумҳури Амрико ҷумъаи 27-уми феврал гуфт, тамоюли ҳамла ба Эронро надорад, аммо мумкин аст ин кор лозим шавад.