Чин дар Тоҷикистон даҳҳо дидбонгоҳи нави марзӣ месозад
Қарор аст, дар ояндаи наздик бо сармояи Чин дар марзҳои гоҳо ноороми Тоҷикистон дидбонгоҳу қароргоҳҳои нав сохта шавад.
Маҷлиси намояндагон ҳафтаи гузашта бо тасдиқи “Номаҳои табодулӣ байни Тоҷикистон ва Чин” роҳро барои иҷрои ин тарҳ ҳамвор кард.
Муродалӣ Раҷабзода, муовини аввали раиси Кумитаи давлатии амнияти миллӣ, дар ҳузури вакилон гуфтааст, ҳадаф аз ин кор “боз ҳам амиқтар гардонидани шарикии стратегӣ байни Тоҷикистон ва Чин” ва посбонии муносиби марзҳои кишвар аст.
Ба гуфтаи вай, баъд аз иҷрои ин расмиёт, Чин дар марзҳои Тоҷикистон бо арзиши тақрибан 425 миллион юан ё 61 миллион доллар иншооти сарҳадӣ месозад.
Ӯ мушаххас нагуфтааст, ки ин чӣ гуна иншоот хоҳад буд, аммо дар гузашта Чин дар марз бо Афғонистон барои афсарони тоҷик чанд дидбонгоҳ ва қароргоҳ бунёд кардааст.
Ба гуфтаи Муродалӣ Раҷабзода, Чин дар солҳои 2017-2018 ба таври ройгон дар марзи ноороми Тоҷикистон бо Афғонистон барои посбонии марз 12 иншооти махсус сохтаву ба истифода дод.
Дар гузашта гузоришҳое ҳам буданд, ки Чин дар қаламрави Тоҷикистон барои худ пойгоҳи низомӣ сохтааст, вале мақомот соли 2024 онро рад карданд.
Чин дар ҳоли ҳозир аз сармоягузорони аслӣ ба иқтисоди Тоҷикистон ба шумор меравад ва қарзи Душанбе аз Пекин бештар аз 800 миллион долларро ташкил медиҳад.
Тоҷикистон бо Чин, бо дувумин иқтисоди бузурги ҷаҳон, тақрибан 500 километр марзи муштарак дорад. Пойбандии кишвар ба Чин сол ба сол бештар мешавад ва ин нигаронӣ вуҷуд дорад, ки Тоҷикистон дар оянда пойбанди амру иродаи сиёсии Чин хоҳад гашт.