Поинравии нархи тило бозори ҷавоҳиротро дар Ҳинд гарм кард
Нархи тилову нуқра, ки дар Тоҷикистон ҳам талабгорони зиёд дорад, рӯзҳои охир дар ҷаҳон пойин омадааст. Ҳоло дар Тоҷикистон расман истироҳат асту вазъи дӯконҳои тилофурӯшӣ ва баҳои расмии тило дар вебсайти Бонки Миллӣ маълум нест. Вале фурӯшгоҳҳои маснуоти заргарӣ дар Ҳиндустон рӯзи 23-юми март шоҳиди муштарии зиёд буданд.
Мардуми муштоқи ин филизи гаронбаҳо дар Ҳиндустон гуфтанд, бо истифода аз фурсат ангуштарӣ ва дастпонаву гӯшвор ё гарданбанди тило мехаранд, то дар оянда аз он истифода кунанд. Чи барои зебу зиннат ва чи барои фурӯхтану фоида гирифтан.
"Ин вазъ барои мо хуб аст, чун кумак мекунад, ки миқдоре тило харем. Пештар нархи он ҳатто то 1,7 лак рупия ё 1823 доллар расида буд. Он замон харидани тило барои мо воқеан фоида надошт. Ҳоло мардум умед доранд, ки метавонанд барои истифода дар оянда каме тило бихаранд," – гуфт яке аз муштариён.
Аз шурӯи даргирӣ дар Ховари Миёна арзиши тило қариб 22 дарсад коҳиш ёфт. Дар муқоиса ба нархи рекордии он ки ҳар унсаш дар охири моҳи январи имсол ба тақрибан 5 ҳазору 600 доллар расида буд, ҳудуди 25 дарсад поин омадааст.
Ашвини Ҷавдекар дар Ҳиндустон ин вазъро имконияте барои сармоягузорӣ медонад: "Бале, нарх бисёр поин омад... ҳам нархи тило ва ҳам нархи нуқра. Бинобар ин, эҳсос мекунем, ки бояд ҳарчи зуд сармоягузорӣ кунем. Ин фурсати хуб аст, зеро агар нарх дар оянда боз боло равад, дигар чунин имкон нахоҳем дошт."
Як таҳлилгар ба хабаргузории “Рейтерс” гуфтааст, идомаи низоъ дар Ховари Миёна ва пойин наомадани нархи баҳра (фоиз) ҷаззобияти тилоро камтар кард.
Вирен Чокси гуфт, “қарор буд, ки Бонки Марказии Амрико нархи баҳра ё фоизро кам кунад ва бар асоси он интизор мерафт, тило то ҳадде ҳимоят шавад. Аммо Иёлоти Муттаҳида нархи баҳраро коҳиш надод... Ҳамин боис гашт, ки арзиши тило боло наравад, балки пойин биояд."
Арзиши нуқра ҳам зиёда аз шаш дарсад поин рафтааст.
Шояд ин вазъ барои иддае хушоянд нест, аммо харидорони сершумор дар Ҳиндустон онро фурсати бисёр муносиб ҳам барои зеб додани дасту гардану гӯш ва ҳам сармоягузорӣ барои оянда медонанд.