Balkanly býujet işgärleri Täze ýyl baýramynda köçeleri arassalap, prezidentiň saparyna taýýarlanýar
Balkan welaýatynyň Türkmenbaşy şäherinde häkimligiň we edara-kärhanalaryň işgärleri Täze ýyl baýramçylygy mynasybetli berlen resmi dynç günlerinde köçeleri arassalamaga mejbur boldular. Muňa prezident Serdar Berdimuhamedowyň öňümizdäki günlerde sebite etmegine garaşylýan saparyna görülýän taýýarlyklar sebäp boldy.
"Taýýarlyklar 30-njy dekabrda başlady. Býujet işgärleri Täze ýyl baýramyndaky dynç günlerinde, ýagny 1-2-nji ýanwarda hem köçeleri arassaladylar. Prezident Berdimuhamedowyň ilkibada Awaza şäherçesindäki rezidensiýasynda düşlejekdigi aýdylýar. Şol sebäpli bu rezidensiýadan aeroporta çenli aralykdaky asfaltlar reňklenýär. Haşal otlar arassalanýar" diýip, Azatlyk Radiosynyň sebitdäki habarçysy aýtdy.
Ýatlatsak, döwlet baştutany Ministrler Kabinetiniň we Döwlet howpsuzlyk geňeşiniň 29-njy dekabrda geçirilen bilelikdäki mejlisinde 2023-nji ýylyň 1-nji ýanwaryndaky dynç gününi 2-nji ýanwara geçirdi.
Ol bu baradaky karara "ýurt ilatynyň Täze ýyly dabaraly belläp geçmegi we oňat dynç almagy üçin oňaýly şertleri döretmek maksady bilen" gelendigini belläpdi.
"Prezident bir karar kabul edýär. Ýöne hemişeki ýaly onuň iş ýüzünde ýerine ýetirilişi başgaça bolýar. Býujet işgärleri Täze ýyly baýram edip, ýylyň ilkinji günlerini maşgalasy bilen geçirmegiň deregine ýene köçeleri arassalamaly boldular. Bu birinji gezek bolýan ýagdaý däl" diýip, balkanly býujet işgäri anonimlik şertinde aýtdy.
Türkmenbaşyda we Awazada howpsuzlyk çäreleri hem güýçlendirildi. Köprüleriň aşagynda kanun goraýjy edaralaryň işgärleri gije-gündiz nobatçylyk çekýärler.
Mundan başga-da, döwlet baştutanynyň öňki prezident Gurbanguly Berdimuhamedow ýaly gumda we deňizde gezelenç etmegine hem garaşylýar. Munuň üçin gumuň içinde we deňiz kenarynda taýýarlyklar dowam edýär.
"Gumuň içinde çopan goşy, ak öý, sazakdan dikilen goýun ýataklary we çaý gaýnatmak hem-de nahar bişirmek üçin ojaklar taýýarlanýar. Munuň üçin ýörite tehnikalar hem işe çekilýär. Çopan, balykçy we nebitçi rollaryny oýnar ýaly aktýorlar gözlenýär. Olar Balkanyň medeniýet öýlerindäki aktýorlaryň arasyndan saýlanyp alynýar" diýip, ýagdaýdan habarly çeşmämiz aýtdy.
Sahnalaşdyrylan oýunlar üçin arassa we semiz goýun-geçiler hem saýlanyp alynýar. Olara weterinar lukmanlar tarapyndan sanjym edilýär.
Çeşmämiziň maglumatyna görä, prezidentiň ýanwar aýynda ýurduň bäş welaýatyna sapar etmegine garaşylýar. Onuň bu saparynyň başynda Balkana geljekdigi aýdylýar.
Ýöne bu sapar we oňa görülýän taýýarlyklar barada, adatça bolşy ýaly, ne türkmen häkimiýetleri, ne-de media serişdeleri habar berýärler. Şol sebäpli bu saparyň amala aşjakdygy ýa aşmajakdygy soňky pursada çenli nämälim bolup galýar. Azatlyk bu barada welaýat we şäher hakimliklerinden goşmaça maglumat ýa kommentariýa hem alyp bilmedi.
Türkmenistanda adatça döwlet baştutanynyň sebitlere etjek saparlarynyň öňüsyrasynda, giň gerimli taýýarlyk görülýär, köçeler arassalanýar, howpsuzlyk çäreleri güýçlendirilýär. Ýöne soňky aýlarda şeýle taýynlyklar Gurbanguly Berdimuhamedowyň sebitlere saparlarynyň öňüsyrasynda hem bolup geçýär.
Serdar Berdimuhamedow Balkana soňky gezek 14-nji dekabrda sapar edipdi. Şonda Türkmenistanyň, Azerbaýjanyň we Türkiýäniň döwlet baştutanlary Awaza şäherçesinde üçtaraplaýyn sammit geçiripdiler.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.