Türkmenistanda agyr gar ýagmagyna garaşylýar
Türkmenistanda agyr gar ýagmagyna garaşylýar. “Metteožurnalyň” 5-nji ýanwarda beren habaryna görä, Türkmenistanda şu hepdäniň başyndan anomal sowuk howanyň bolmagyna, howanyň käbir ýerlerde adaty klimat kadalaryndan 10-16 gradus aşak gaçmagyna garaşylýar.
Türkmen metbugaty adatça adamlaryň durmuşyna täsir ýetirjek güýçli howa üýtgemeleri barada hem öňünden anyk maglumat bermeýär. Emma bu gezekki garly howa “Watan” habarlar programmasynda hem agzaldy.
Şol bir wagtda, hökümetçi “Türkmenportal” neşiri Türkmenistanyň günorta-gündogarynda ýagmagyna garaşylýan güýçli gar barada has anyk habar bermäge çalyşdy.
Çaklamalara görä, gar 9-10-njy ýanwar gijesinde ýagyp başlar we 10-njy ýanwara çenli dowam eder, onuň galyňlygy 10 — 15 sm bolar öýdülýär.
8-nji ýanwardan 9-njy ýanwara geçilýän gije Aşgabatda şu ýylyň ilkinji gary ýagdy.
Hökümetçi neşir şu gün agşam Aşgabatda howanyň temperaturasynyň -3-e düşjegini, gije -6 gradus aýaz boljagyny duýdurýar.
Özbek häkimiýetleri ilata ýetip gelýän sowuk howa barada duýduryş berip, onuň azyndan 15-nji ýanwara çenli saklanmagyna garaşylýandygyny habar berdi.