Bug gazanlarynyň gaz üpjünçiligi bilen bagly aladalar hususy önüm öndürijileriň gazynyň kesilmegine getirýär
Türkmenistanda adatdan daşary sowuk howa dowam edýän mahaly, Balkan welaýatynyň dürli sebitlerinde ýyladyş ulgamlarynyň gaz üpjünçiligi bilen bagly aladalaryň fonunda hususy önüm öndürijileriň gazy kesilýär.
Balkanabat şäherinde, Gyzylarbat, Bereket we Magtymguly etraplarynda howanyň aşa sowamagy bilen, ýyladyşhanalaryň we çörek söwdasy bilen meşgullanýan hususy telekeçileriň gaz üpjünçiligi kesilýär diýip, Azatlyk Radiosynyň habarçysy 15-nji ýanwarda sebitden habar berdi.
Ýerli ýaşaýjylar hususy önüm öndürijileriň gaz üpjünçiliginiň kesilmeginiň ýyladyş ulgamlarynyň bug gazanlaryna zerur bolan tebigy gazyň ýetmeýändigi bilen düşündirilýändigini aýdýarlar.
Bu ýagdaý tamdyr çöregini öndürýän hususy telekeçileriň hem-de ýyladyşhana eýeleriniň önümçilik bilen meşgullanmagyna oňaýsyz täsir ýetirýär.
Gaz üpjünçiliginiň kesilmegi tamdyrda çörek bişirip satýan hususyýetçileriň adatdan daşary çärelere ýüz urmagyna alyp gelýär. Olaryň aglabasy tamdyrlarda odun ýa-da mebel galyndylaryny ýakyp, çörek bişirmäge çalyşýarlar.
Ýöne şäher ýerlerinde odun ýakylýan tamdyrlardan çykýan tüsseler häkimiýetleriň şäherde tüsse çykmagyna gadaganlyk girizmegine alyp gelýär.
“Şäher ýerlerinde Öý dolandyryş edaralarynyň işgärleri ‘tüsse bolmasyn’ diýip, tamdyrda odun ýakylmagyny hem gadagan etdiler. Şeýlelikde, tamdyr çöreginiň önümçiligi bilen meşgullanýan ençeme aýal-gyzlar işsiz galdylar, telekeçiler girdejisiz galdylar” diýip, hususyýetçiler aýdýarlar.
Hususy önüm öndürijileriň gaz üpjünçiliginiň kesilmeginiň bahar aýlaryna çenli dowam etmegine garaşylýar.
“1-nji marta çenli düýbünden gadagan diýdiler” diýip, hususy önümçilik kärhanasynyň gaz üpjünçiligi wagtlaýyn kesilen bir telekeçi Azatlyk Radiosynyň habarçysyna gürrüň berdi.
Türkmen häkimiýetleri mundan ozal hem ýurduň dürli sebitlerinde tamdyrlara çekilen gaz geçirijileri aýyrmak, ýyladyşhanalaryň gaz üpjünçiligini çäklendirmek ýaly çärelere wagtal-wagtal ýüz urýardylar. Şeýle çäreler mundan ozal hem häkimiýetler tarapyndan ýurduň tebigy gaz serişdelerini tygşytlamak aladalary bilen düşündirilýärdi. Ýöne soňky birnäçe hepde bäri ýurda adatdan daşary sowuk howa aralaşýar. Bu aralykda, ýurduň dürli sebitlerinde ýyladyş ulgamlarynyň ýygy-ýygydan hatardan çykmagy bilen bagly habarlaryň arasynda häkimiýetler Balkan sebitinde bug gazanlarynyň tebigy gaz üpjünçiligini “bökdençsiz ýola goýmak tagallalarynyň çäklerinde” hususy önüm öndürijileri tebigy gaz üpjünçiliginden mahrum edýärler.
Tebigy gaz gorlarynyň subut edilen möçberleri boýunça dünýä ýurtlarynyň arasynda öňdäki orunlary eýeleýän Türkmenistanda tamdyr çöreginiň önümçiligi we ýyladyşhana işleri “möhüm durmuş desgalarynyň gaz ýetmezçiligi” bilen bagly aladalaryň arasynda bökdelýär.
Gyzylarbat we Bereket etraplarynda miwe we gök-bakja önümlerini ösdürip ýetişdirýän ýyladyşhana eýeleri oba hojalyk önümlerini sowuk urýandygyny, olaryň zaýalanýandygyny aýdýarlar.
Azatlygyň habarçysy soňky birnäçe gün bäri sebitiň käbir künjeklerinde howanyň temperaturasynyň -15 gradusa çenli sowandygyny habar berýär.
Döwlet telewideniýesiniň “Watan” habarlary gepleşigi 15-nji ýanwarda öňümizdäki hepdäniň dowamynda Balkan welaýatynda howanyň temperaturasynyň gijelerine -5...-10 gradus sowukdan +3 gradusa çenli maýyl bolmagyna garaşylýandygyny, gündizlerine bolsa sebitde howanyň temperaturasynyň +9 gradusa çenli, sebitiň kenarýaka etraplarynda bolsa +5 gradusa çenli maýyl bolmagyna garaşylýandygyny habar berdi.
Ýerli ýaşaýjylar sebitde soňky birnäçe gün bäri dowam edýän sowuk howanyň taryhda örän seýrek bolandygyny aýdýarlar.
“Ýyladyşhanalar şeýle sowuk howa niýetlenmedik, olary ätiýaç odun bilen gyzdyrmak hem göz öňünde tutulmadyk” diýip, balkanly önüm öndürijiler aýdýarlar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.