Gazagystanda žurnalistlere edilen hüjümleri utgaşdyran diýilýän adam saklandy
Gazagystanyň Içeri işler ministrligi soňky döwürde garaşsyz žurnalistlere edilen hüjümleriň birnäçesini utgaşdyran adamy tussag edendigini aýdýar.
Ministrligiň resmisi Albina Mahambetowa 28-nji fewralda "O. Tokarew diýlip tanalýan daşary ýurt raýatynyň” Merkezi Aziýanyň iň uly şäheri Almatyda tussag edilendigini aýtdy.
Resmi maglumata görä, polisiýa we howpsuzlyk işgärleri onuň öýünden sentýabr aýyndan bäri tanymal žurnalistleriň birnäçesine garşy guralan hüjümleri utgaşdyrandygyny görkezýän materiallary tapypdyr.
"Jenaýat topary tarapyndan amala aşyrylan hüjümleriň esasy maksady Gazagystanyň prezidentini we onuň dowam etdirýän demokratik reformalaryny abraýdan düşürmekden ybarat. Güman edilýän adam deslapky tussaghanada ýerleşdirildi. Derňew işleri alnyp barylýan wagtynda beýleki jikme-jiklikler açylyp bilinmeýär” diýip, Mahambetowa aýtdy.
Biraz öň, hüjümleri amala aşyrmakda güman edilip tussag edilen beýleki adamlara žurnalistika işjeňligine päsgel bermek, şahsy durmuşa goşulmak, haýbat atmak, hususy emläge zeper ýetirmek we bozgakçylyk aýyplamalary bildirildi diýip, ol sözüniň üstüni ýetirdi.