Türkmenistan bilen ABŞ howpsuzlyk ulgamyndaky hyzmatdaşlygy maslahatlaşdy
Türkmenistanyň daşary işler ministriniň orunbasary Wepa Hajiýew 18-nji aprelde ABŞ-nyň döwlet sekretarynyň Yaraglanyşyga gözegçilik etmek, barlag we ýerine ýetiriş boýunça kömekçisi Mellori Stýuart bilen telefonda gürleşdi diýip, türkmen metbugaty habar berýär.
Telefon söhbetdeşliginiň dowamynda, resmi habarda anyklaşdyrylman aýdylmagyna görä, dürli halkara we sebit guramalarynyň çäklerinde howpsuzlyk ulgamynda alnyp barylýan hyzmatdaşlyk ara alnyp maslahatlaşyldy.
Taraplar ynanyşmagy we howpsuzlygy berkitmek çäreleri barada 2011-nji ýylyň Wena Resminamasyny durmuşa geçirmek prosesine aýratyn üns berdiler.
Hususan-da, ikitaraplaýyn gepleşikler arkaly, bu ylalaşygy ýerine ýetirmek üçin dialogy işjeňleşdirmegiň, ýöriteleşdirilen okuwlary we tälimleri gurnamak bilen hünärmenleriň mümkinçiliklerini pugtalandyrmagyň möhümdigi bellenildi diýip, habarda aýdylýar.
Şu nukdaýnazardan, taraplar häzirki döwrüň wehimlerine we howplaryna netijeli garşy durmagyň zerurdygyny nygtadylar, ýaraglanyşyga gözegçilik etmek boýunça çäreleri berkitmegiň gurallaryny we bu ugurdaky halkara borçnamalary ýerine ýetirmek meselelerini maslahatlaşdylar.
Telefon söhbetdeşliginiň haýsy tarapyň başlangyjy esasynda geçirilendigi aýdylmaýar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.