Baýden Gazadaky hassahana partlamasynyň Ysraýyl däl, ‘beýleki topar tarapyndan edilene meňzeýändigini’ aýtdy
Prezident Jo Baýden 18-nji oktýabrda Gaza zolagyndaky bir hassahanada ýüzlerçe adamy öldüren partlamanyň Ysraýyl tarapyndan amala aşyrylana meňzemeýändigini aýtdy.
“Meniň gören zatlarymyň esasynda, bu, siz däl, beýleki topar tarapyndan edilene meňzeýär” diýip, Baýden duşuşykda Ysraýylyň premýer-ministri Benýamin Netanýahuwa aýtdy.
Ýöne partlama nämäniň sebäp bolandygyny bilmeýän “bir topar adam bar” diýip, Baýden aýtdy.
“Hamas” tarapyndan dolandyrylýan Gazanyň Saglyk ministrligi ysraýyl howa zarbasynyň weýrançylyga sebäp bolandygyny aýtdy.
Ysraýyl harbylary öz gatyşygyny ret etdi we beýleki bir jeňçi toparynyň, “Palestinaly yslamçy jihad” toparynyň ýalňyş ot açylan raketasyny aýyplady. Ol gurama hem jogapkärçiligi ret etdi.
Ysraýyl harbylary Gazanyň şäher hassahanasynda 17-nji oktýabrda ýüzlerçe adamy öldüren partlama gatyşygyny ret edip, bu partlama ýalňyş ot açylan palestin raketasynyň sebäp bolandygyny aýtdy.
Gazada “Hamas” tarapyndan dolandyrylýan Saglyk ministrligi ysraýyl howa zarbasynyň partlama getirip, aglaba bölegi dowam edýän ysraýyl hüjüminden pena gözleýän adamlardan ybarat bolan 500 çemesi adamyň öldürilendigini aýtdy.
Ýöne Ysraýyl harbylary wakanyň bolan wagtynda palestinaly jeňçileriň keselhananyň golaýynda köp sanly raketalary atandyklaryny aýtdy.
Taraplaryň hiç haýsynyň öňe sürýän wersiýalary bada-bat tassyklanylyp bilinmedi.
ABŞ prezidenti Jo Baýdeniň Ysraýyla we Iordaniýa amala aşyrýan onsuz hem oňaýsyz sapary 17-nji oktýabrda Gazadaky bir hassahanada bolup geçen we ýüzlerçe palestinalynyň ölümine getiren partlamadan soňra, has-da çylşyrymlaşdy.
Palestin häkimiýetleri partlama boýunça ysraýyl harbylarynyň jogapkärdigini aýtdy. Ysraýyl harbylary özleriniň anklawada dowam etdirýän köpçülikleýin bombalamalarynyň arasynda bolup geçen partlama öz gatyşygyny ret etdi.
Palestin prezidenti Mahmud Abbas partlamadan soň, Baýden bilen geçirilmegi meýilleşdirilen duşuşygy goýbolsun etdi. Soňra Iordaniýanyň patyşasy Abdylla müsür we palestin liderlerini Baýden bilen duşurmagy göz öňünde tutan sammiti tutuşlygyna goýbolsun etdi.
Bu aralykda, BMG “Hamasyň” hüjümini we asuda raýatlara garşy zorluklaryň ählisini ýazgarjak Gaza çözgüdi boýunça ses berer.
BMG-niň Howpsuzlyk Geňeşi 18-nji oktýabrda ilkibaşda “Hamas” tarapyndan Ysraýylyň üstüne edilen “aýylganç terror hüjümlerini”, şeýle-de asuda raýatlara garşy zorluklaryň ählisini ýazgaran, hem-de Gazadaky millionlarça adama iňňän zerur bolan ynsanperwer ýardamlaryň eltilip berilmegine çagyrýan rezolýusiýa boýunça ses berer.
Braziliýa tarapyndan hemaýat edilen çözgüdiň nusgasynyň sözleri boýunça gepleşikler dowam etdi we sese goýuljak çözgüdiň ahyrky wersiýasy 17-nji oktýabr güni giç agşama çenli heniz çap edilmändi.
Bu ses berişlik Geňeşiň 16-njy oktýabrda Russiýa tarapyndan “Hamas” agzalmazdan taýýarlanylyp, asuda raýatlara garşy zorlugy we terrorçylygy ýazgaran hem-de “ynsanperwer ýaraşyga” çagyran çözgüdi ret etmeginiň yz ýany geçirilýär.
Bu aralykda, Türkmenistanyň hökümeti Ysraýyl – “Hamas” krizisi boýunça dymyşlygy saklaýar. Türkmenistanyň Daşary işler ministrligi ne zorlugy ýazgaryp, ne-de taraplary saklanmaga çagyryp beýanat çap etdi.
Türkmenistanyň köpçülikleýin habar beriş serişdeleri Ýakyn gündogarda bolup geçýän ganly çaknyşyklar barada habar bermeýär.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.