Türkmenistanda harby okuw türgenleşigi geçirildi
21-nji oktýabrda Türkmenistanyň prezidenti Serdar Berdimuhamedow “Kelete” okuw-türgenleşik merkezinde geçirilen ýurduň Ýaragly güýçleriniň we beýleki goşunlarynyň bilelikdäki harby okuw türgenleşigini synlady.
Resmi habarda bu gezekki harby okuw türgenleşiginiň ýurduň beýleki goşun galalaryndaky we deňiz güýçlerindäki okuw merkezlerinde-de geçirilendigi, olaryň sanly ulgamyň mümkinçilikleri esasynda göni ýaýlymda görkezilendigi aýdylýar.
Toparlaryň öňünde garşylykly hereket edýän toparlary zyýansyzlandyrmak, garşydaşyň howa hüjümlerine garşy göreşmek, ýörişi bökdemek üçin döredilen meýdandan ýörite himiki gorag serişdelerini ulanyp ýitgisiz geçmek, suw päsgelçiliklerinden geçmek boýunça wezipeler goýulypdyr.