Eýran bilen dartgynlylyklaryň arasynda, ABŞ Bagdaddaky ilçihanasynyň zerur bolmadyk işgärleriniň sanyny azaldýar
ABŞ Ýakyn Gündogardaky operasiýalarynyň işi üçin zerur hasaplanmaýan sebitdäki işgärleriniň sanyny azaldylýar. Bu barada 11-nji iýunda Döwlet departamenti mälim etdi. Media habarlarynda, sebitde howpsuzlyk töwekgelçilikleriniň ýokarlanmagy bilen baglylykda, Bagdaddaky ABŞ ilçihanasynyň gyssagly ewakuasiýa taýýarlyk görýändigi bellenilýär.
Şol bir wagtyň özünde, ABŞ Bahreýn we Küweýt boýunça hem zerur bolmadyk işgärleriniň we olaryň maşgalalarynyň ýurtdan çykmagyna rugsat berdi, olara gitmek ýa-da galmak baradaky karary kabul etmek ygtyýary berildi.
Yragyň Daşary işler ministrliginiň bir resmisi ABŞ-nyň ilçihanasynyň işgärleriniň “çäklendirilen ýagdaýa çykmagyny” tassyklady. Onuň sözlerine görä, bu karar “sebitleýin dartgynlylyk bilen bagly howpsuzlyk aladalary” esasynda kabul edilipdir.
ABŞ bilen Eýranyň arasyndaky ýadro gepleşikleriniň petige dirändigine çalym etmegi bilen, sebitde dartgynlyk ýokarlanýar.
Gepleşikler Eýranyň ýadro maksatnamasyny çäklendirmeginiň öwezine ABŞ-nyň girizen ykdysady sanksiýalarynyň bölekleýin ýatyrylmagyny maksat edinýär. Eýran özüniň ýadro programmasynyň diňe parahatçylyk maksatlydygyny öňe sürýär.
Eýran ABŞ bilen gepleşikleriň nobatdaky tapgyrynyň 15-nji iýunda Omanda geçiriljekdigini aýdýar. Tähran ABŞ-nyň hödürlän teklibinden ýüz öwüreninden soň, täze şertleri hödürlemegiň üstünde işleýär. Eýranyň ýokary ruhany lider Aýatolla Ali Hameneýi Waşingtonyň teklibini “ýurduň milli bähbitlerine ýüz göterim garşy” diýip häsiýetlendirip, oňa garşy çykypdy.