Балтач мәктәбе укучылары мич коймагы белән сыйланды
(Казан, 6 гыйнвар, «Татар-информ», «Хезмәт», Гөлзидә Газизуллина). Балтач урта мәктәбенең 3 в сыйныфы укучылары Яңа ел алдыннан сыйныф җитәкчесе Альбина Әскарова һәм әти-әниләр белән берлектә Көектәге фазенда да ял итте. Алар мичтә пешкән коймак белән сыйланды. Бу турыда район басмасы хәбәр итте.
Балалар тау шуды, әти-әниләр шашлык кыздырды, самавырда чәй кайнатты. Фазенда хуҗасы исә кунакларны мич коймагы белән сыйлады.
«Балалар ихластан куанды, үзебез өчен дә бик зур бәйрәм булды. Сыйныф җитәкчебезгә олы рәхмәтләребезне ирештерәбез. Әти-әниләр, балаларыбыз үзара гел дус булып яшәсен. Яңа еллар иминлек, сәламәтлек алып килсен», - дип изге теләкләрен ирештерде әти-әниләр исеменнән Илһамия Газизуллина.