Ижауның уникенче мәктәбендә татар балалары өчен түгәрәк оештырылган
(Казан, 11 гыйнвар, «Татар-информ»). Ижау шәһәренең Татар бистәсендә 12нче мәктәптә Рәзинә Муса кызы Җәлилева татар теле түгәрәге оештырды һәм уңышлы гына эшли. Бу турыда «Яңарыш» газетасы хәбәр итә.
«Беренче елда татар теле түгәрәгенә 12 укучы, икенче елда 30 бала йөрде, ә быел инде татар телен өйрәнергә 50 укучы теләк белдерде, хәтта араларында рус балалары да бар.Түгәрәктә шөгыльләнүче укучыларның яртысы катнаш, ә калганнары саф татар гаиләләрендә тәрбияләнә. Әмма татарча сөйләшүче балалар юк. Араларында татарча аңлаучы, әмма җавап бирә алмаучылары күп», дип сөйләде ул.
«Түгәрәктә 107нче балалар бакчасында тәрбияләнгән 7 укучы татар телен өйрәнүләрен дәвам итә. Әлбәттә, ул балалар белән эшләве җиңел. Укучыларның түгәрәккә бик теләп йөрүләре сөендерә. 50 укучы йөри башлагач, ике төркемгә бүлеп өйрәтә башладым. Бераз вакыттан соң, укучыларның саны сирәгәер, дип уйлаган идем. Тик бүгенге көнгә кадәр берсе дә татар теле түгәрәгенә йөрүен ташламады», — ди Рәзинә Җәлилева.
Эше нәтиҗәле булсын өчен Рәзинә Муса кызы төрле алымнар куллана. Ике ел түгәрәктә төрле темалар буенча татарча сүзләр өйрәнгәннәр. Әмма атнага бер сәгать кенә шөгыльләнү сәбәпле, аның нәтиҗәсен күрми башлаган.
Балалар белән «Шалкан» әкиятен сәхнәләштереп, театр ярдәмендә укучыларның сөйләм телләрен тагын да шомартырга уйлыйлар. Күп очракта балалар аерым сүзләрне ятлыйлар, тик татар телендә сөйләшә алмыйлар. Рәзинә Җәлилева үз алдына иң беренче чиратта балаларның сөйләм телен үстерүне, дәрестә өйрәнгәннәрен аралашканда файдаланырга өйрәтүне максат итеп куя.